Ҳалокати ду дучархарон дар Хатлон ва як пиёдагард дар Хуҷанд

ВКД аз ҳалокати ду дучархарон дар Хатлон ва як пиёдагард дар Хуҷанд хабар дод.

Тибқи иттилои ВКД, 11-уми апрел Сатторов Абдулло, ронандаи автомашинаи тамғаи “Хундай Портер” ҳангоми дар роҳи мошингарди ҷамоати Заргари ноҳияи Кушониён ҳаракат кардан воситаи нақлиёташро идора карда натавониста, дучархарони ноболиғ Махсумов Нусратуллоро пахш намудааст. Оқибат, ноболиғ ҷароҳатҳои гуногуни вазнини ҷисмонӣ бардошта, дар ҷойи ҳодиса ба ҳалокат мерасад.

Инчунин, ҳамин ниҳод хабар медиҳад, ки ба ҳамин монанд, санаи 10-уми апрел низ Абдуллоев Нурмуҳаммад, ки ронандаи автомашинаи тамғаи “Тойота Авенсис” будааст, ҳангоми аз самти ҷамоати Қизил-Қалъа ба Қубодиён рафтан дар наздикии деҳаи Меҳнатободи ноҳияи Хуросон аз уҳдаи таъмини қоидаи бехатарӣ набаромада, дучархарони ноболиғ Холов Шаҳбозро пахш кардааст. Дар натиҷа, ин ноболиғ низ захмҳои вазнин бардошта, ҳангоми бурдан ба беморхона дар роҳ фавтидааст.

“Ҳамин тариқ, боз ҳам таърихи 10-уми апрел ронандаи автомашинаи тамғаи «Опел-Астра» Аминҷонов Юсуфҷон ҳангоми ҳаракат дар маҳаллаи 18-уми шаҳри Хуҷанд аз уҳдаи идораи воситаи нақлиёт набаромада, пиёдагард Латипов Абдулҳакимро, ки аз тарафи рости роҳ ба чап мегузашт, пахш намудааст. Дар натиҷа пиёдагард Латипов А. ҷароҳатҳои гуногуни ҷисмонӣ бардошта, дар беморхона ба ҳалокат расидааст”,- иттилоъ медиҳад манбаъ.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube