Боз Навалний…Ӯ соҳиби ҷоизаи Сахаров шуд

Сиёсатмадори мухолифи Путин, Алексей Навалний, барандаи ҷоизаи “Озодии андеша” ба номи Сахаров шуд.

Дар ин бора мақомот дар Порлумони Аврупо, ки ба ҷараёни қабули қарор наздик ҳастанд, рӯзи 20-уми октябр ба Радиои Аврупои Озод/Радиои Озодӣ хабар доданд.

Ҷоизаи муътабар барои мубориза барои озодии баён ва демократия дар ҳоле тақдим мешавад, ки худи Алексей Навалний, сиёсатмадори 45-солаи мухолиф ва муассиси Бунёди мубориза бо коррупсия, аз моҳи январи имсол дар зиндон аст.

Ӯро моҳи августи соли 2020 бо нишонаҳои заҳролудшавӣ ба беморхонае дар шаҳри Берлин бурданд ва таҳқиқоти озмоишгоҳҳои мустақил заҳри низомӣ будани ин маводро исбот кард. Худи Навалний президенти Русия Владимир Путинро ба амр додани заҳролудкунии худ гунаҳкор кард. Кремлин ин иттиҳомотро ҳамеша рад кардааст.

Баъди бозгашт аз муолиҷа, Навалний моҳи январи имсол дар фурудгоҳ боздошт шуд ва бо иттиҳоми нодида гирифтани ҳукми додгоҳи қаблӣ ба 2,5 сол ҳабс маҳкум шуд.

Расман номи барандаи имсолаи ҷоиза ва 50 ҳазор евро мукофотпулиаш рӯзи 21-уми октябр эълон хоҳад шуд.

Қаблан президенти Африқои Ҷанубӣ Нелсон Мандела, фаъоли покистонӣ Малола Юсуфзай, ҳомии уйғурҳои Чин Илҳом Тохтӣ ва мухолифони беларусӣ барандаи ин ҷоиза шудаанд.

Ҷоизаи ба номи Сахарови Парлумони Аврупоро аз соли 1988 ба онҳое тақдим мешавад, ки дар роҳи мубориза барои ҳуқуқи инсон ва озодиҳои бунёдӣ корнамоӣ кардаанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube