Резаахбор: Аз голҳои Тоҷикистон то Ҷоми Осиё

6-уми феврал дастаи мунтахаби ҷавонони футболбози Тоҷикистон (U-20) таҳти роҳбарии мутахассиси белорусӣ Олег Кубарев бо тими ҷавонони Озарбойҷон бозии санҷишӣ анҷом дод. Вохўрӣ бо пирўзии тими миллии Тоҷикистон — 2:1 анҷом ёфт. Голҳои Тоҷикистонро Салам Ашўрмамадов ва Алиҷони Айнӣ заданд.

***

Рўзҳои 11-12-уми феврал Чемпионати ҷудои Тоҷикистон баргузор мешавад. Мусобиқаи мазкур дар Маҷмааи варзишии Қасри теннис ва варзиши обии шаҳри Душанбе миёни 250 ҷудокор (230 мард, 20 зан) аз ҳамаи манотиқи кишвар дар 14 вазн ба нақша гирифта шудааст.

***

Собиқ футболбози дастаҳои «Челси», «Нюкасл» ва «Порту» Кристиан Атсу, ки зери бинои харобшудаи заминларзаи Туркия қарор дошт, баъд аз як рўз зинда ёфт шуд. Ба иттилои A Bola, футболбози 31-солаи дастаи “Хатайспор” ва тими миллии Ғано ба бемористон мунтақил шудааст. Пойи рости бозигар захмӣ шудааст ва нафаскашиаш душвор гуфта мешавад.

***

Арабистони Саудӣ бори аввал Ҷоми Осиёро дар соли 2027 мизбонӣ хоҳад кард. Ин тасмим дар Конгресси Конфедератсияи футболи Осиё (AFC), ки 1-уми феврал дар шаҳри Манамаи Баҳрайн доир гардид, гирифта шуд. Арабистони Саудӣ ягона номзад буд. Ҷоми Осиё-2023 бояд дар Қатар баргузор шавад, ки дар он дастаи мунтахаби Тоҷикистон низ ширкат мекунад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube