Резаахбор: Аз идомаи фаъолияти Амирбек то хет-трики “Соро компания”

Нимҳимоятгари дастаи мунтахаби футболи Тоҷикистон Амирбек Ҷўрабоев фаъолияти худро дар бошгоҳи футболи «Кедах»-и Суперлигаи Малайзия идома медиҳад. Охирин бошгоҳи Амирбек Ҷўрабоев бошгоҳи «Юнайтед Сити»-и Филиппин буд. Мавсими нави Суперлигаи Малайзия аввали моҳи марти соли 2023 оғоз мешавад.

***

КМВА (Душанбе) сармураббӣ ва ҳайати нави мураббиёни дастаро барои мавсими нав эълон кард. Сармураббии даста мутахассиси маҳаллӣ Аҳилиддин Турдиев таъйин шудааст. Ба ў Файзалӣ Давлатов ва Алиҷон Турдиназаров ёварӣ мекунанд. Инҳо пеш аз ин дар дастаи мунтахаби футболбозони то 20-солаи Тоҷикистон кор мекарданд, ки дастаро ба финали Ҷоми Осиё (U-20) бароварданд. Турдиев дар ин вазифа мутахассиси эронӣ Аббос Азизиро иваз кард.

***

Бадансоз (бодибилдер) аз Тоҷикистон Жасмин Ан-Нимр дар чемпионати 13-уми WBPF 2022 дар Пхукети Тайланд қаҳрамони ҷаҳон шуд. Дар ин бора худи варзишгар дар саҳифаи инстаграми худ хабар дод. Моҳи июли соли ҷорӣ ў дар 54-умин чемпионати бадансозии Осиё, ки дар Молдив баргузор шуд, ғолиб омада буд. Ўро собиқ раҳбари Федератсияи бодибилдинг ва пауэрлифтинги кишвар Олим Парпиев тамрин медиҳад.

***

Дастаи «Соро компания»-и Душанбе дар соли 2022 хет-трики тиллоӣ кард. Пас аз пирўзӣ дар Суперҷоми Тоҷикистон ва Суперлигаи Тоҷикистон дастаи Пайрав Воҳидов барандаи Ҷоми кишвар низ гардид. Дар бозии ниҳоии Ҷоми Тоҷикистон-2022 «Соро компания» бар тими «Амонатбонк» бо ҳисоби 5:0 пирўз шуд. Дубли Самандар Ризомов, голҳои Дилшод Саломов, Идрис Ёров ва легионери эронӣ Муҳсин Муҳаммадзода ба «Соро компания» ғалаба оварданд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube