Резаахбор: Аз вазифаи нави Сантуш то гузариши Раҳимов

Иттиҳодияи футболи Лаҳистон эълон кард, ки мутахассиси португалӣ Фернанду Сантуш сармураббии нави дастаи мунтахаби фтуболи ин кишвар таъйин шудааст. Сантуш аз соли 2014 сарварии тими миллии Португалияро бар уҳда дошт ва пас аз Ҷоми ҷаҳонии соли 2022 ин дастаро тарк кард. Сантуш бо дастаи мунтахаби Португалия соли 2016 дар ҷоми Аврупо ва соли 2017 дар Лигаи миллатҳои Аврупо пирўз шудааст.

***

Дар Тоҷикистон созмони нави варзишӣ ба қайд гирифта шуд, ки ин Федератсияи парапланронӣ аст. Рўзҳои наздик дар ҷаласаи умумии Федератсия роҳбар ва кормандони масъул таъйин карда мешаванд. Парапланронӣ парвоз дар параплан (ҳавопаймои хеле сабук, ки дар асоси парашютҳои парвозкунанда сохта шудааст) аст. Баръакси ҷаҳидан бо парашютҳои идорашаванда параплан парвози воқеӣ дар бол бо истифода аз энергияи ҷараёнҳои болоравии ҳаво мебошад.

***

Дастаи мунтахаби занонаи футзали Тоҷикистон бо роҳбарии мутахассиси эронӣ Мустафо Афшорӣ ба шаҳри Тошканди Ӯзбекистон рафт, то дар дар чемпионати Ассотсиатсияи футболи Осиёи Марказӣ (CAFA) ширкат кунад. Дар Чемпионати CAFA-2023, ки аз 25 то 31-уми январ баргузор мешавад, дастаи занонаи Тоҷикистон бо дастаҳои мунтахаби Ӯзбекистон (27-уми январ), Эрон (28-уми январ) ва Қирғизистон (30-юми январ) бозӣ мекунад.

***

Нимҳимоятгари 24-солаи дастаи мунтахаби футболи Тоҷикистон Муҳаммадҷон Раҳимов ба бошгоҳи «Насаф»-и Қаршӣ, ки дар мавсими нави Суперлигаи Ӯзбекистон баромад мекунад, гузариш кард. Шартномаи Муҳаммадҷон Раҳимов бо «Насаф» то охири соли 2023 муҳлат дорад. Пештар Қаблан Раҳимов дар дастаҳои «Равшан», «Ҳосилот» ва «Истиқлол»-и Тоҷикистон, инчунин дар «Ордабаси»-и Қазоқистон бозӣ кардааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube