Ҳалокати 4 нафар дар як садама

Бар асари садамаи нақлиётӣ дар ноҳияи Восеъи вилояти Хатлон дар рӯзи 1 июн чаҳор нафар ҷон бохтанд.

Бино ба иттилои Маркази матбуоти Вазорати корҳои дохилии Тоҷикистон, Қурбоналӣ Абдураҳимов, ронандаи автомашинаи тамғаи “Опел-Астра”, сокини ноҳияи Ҳамадонӣ, ҳангоми ҳаракат аз самти шаҳри Душанбе ба самти шаҳри Кӯлоб дар ҳудуди ҷамоати деҳоти Гулистони ноҳияи Восеъ аз уҳдаи идораи воситаи нақлиёт набаромада, ба автомашинаи тамғаи “Опел-Вектра”, таҳти идораи ронанда, Маҳмадӣ Нусратов, сокини ноҳияи Данғара бархӯрдааст.

Бар асари ин садама ду мусофири хурдсоли “Опел-Астра”-Раҳим Абдураҳимови 2-сола ва Султонҷон Абдураҳимови соли таваллудаш 2019 ва ду мусофири “Опел-Вектра” Азизулло Нусратови 64-сола ва Озода Нусратоваи 37-сола дар маҳали ҳодиса ба ҳалокат расидаанд.

Ронандаҳои ин ду автомобил ҷароҳатҳои сахт бардошта ва дар бемористон бистарӣ шудаанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube