Соли оянда ҷашни 5500-солагии Саразм таҷлил мешавад

Эмомалӣ Раҳмон, раиси ҷумҳури Тоҷикистон рӯзи 31март дар маросими ифтитоҳи Қасри фарҳанги деҳоти ба номи Ҳайдар Усмонов дар ноҳияи Бобоҷон Ғафуров дар ин бора хабар дод.

Вай аз ҷумла гуфт: “Ин чорабинӣ имкон медиҳад, ки мо фарҳанги беш аз 5500 — солаи халқамонро, ки аз ҷониби мутахассисону коршиносони маъруф ва доираҳои илмии бонуфузи ҷаҳон эътироф шудааст, ба ҷаҳониён ба таври шоиста муаррифӣ намоем”.

Саразм дар 15 километрии ғарби шаҳри Панҷакент ва 45-километрии шаҳри Самарқанд воқеъ шудааст. Саразм ба гуфтаи бостоншиносон, як ёдгории беназире маҳсуб мешавад, ки дар худ робитаҳои фарҳангии мардуми мухталиф дар Осиёи Марказиро таҷассум кардааст. 

Ёдгории таърихии Саразм тирамоҳи соли 1976 аз ҷониби бостоншинос Абдуллоҷон Исҳоқов кашф гардид. Ба гуфтаи бостоншиносон, сар аз охири ҳазораи IV-уми пеш аз милод шаҳри Саразм ба яке аз марказҳои ҳунармандии минтақаи Осиёи Марказӣ табдил меёбад ва ба ин захираҳои бойи тилло, нуқра, мис, сурб ва рўҳ дар кўҳҳои болооби дарёи Зарафшон мусоидат кардааст. 

Ҳафриёт дар ин ёдгории таърихӣ ва кашфи баъзе аз ашё, ба таври рӯшан, нақши ин маҳал дар мубодилот ва тиҷорат миёни миёни минтақаҳои ниҳоят гуногунро нишон медиҳад, аз ҷумла Туркманистони ҳозира, Байнанаҳрайн, таммадуни Ҳинд ва албатта Осиёи Марказиро.

Саразми бостонӣ бештар аз якуним километр тул ва 700 метр бар дорад, ки ин як маҳалли маскунии бисёр бузург аст ва дар он аҳд воқеан бисёр барҷаста маҳсуб мешавад.

Ҳукумати Тоҷикистон бо як қароре аз 21-уми сентябри соли 2001, ёдгории қадимаи таърихии 5500-солаи шаҳраки Саразмро ҳамчун маркази ташаккули фарҳанги заминдорӣ, ҳунармандӣ ва шаҳрсозии тоҷикон мамнўъгоҳи таърихиву бостоншиносӣ эълон карда буд.

Кумитаи мероси фарҳангии Муассисаи илм ва фарҳанги Созмони Милали Муттаҳид — ЮНЕСКО дар моҳи августи соли 2010 бо судури як қарор ёдгории таърихии Саразм дар Панҷакенти Тоҷикистонро ба феҳрасти мероси ҷаҳонии фарҳангӣ ворид кард.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube