Ҳукми боздошти сарвазири Исроил

Суди байналмилалии ҷиноӣ дар шаҳри Гаагаи Ҳолланд рӯзи 21-уми ноябр қарори ҳабси ду мансабдори баландпояи Исроил ва як фармондеҳи «Ҳамос»-ро содир кард.

Муҳаммад Зайф, фармондеҳи низомии “Ҳамос”, ки аз ҷониби Амрикову Иттиҳоди Аврупо созмони террористӣ номида шудааст, Бенямин Нетаняҳу, нахуствазир ва Йоав Галлант, собиқ вазири дифои Исроил ба ҷиноят алайҳи башарият дар Навори Ғазза муттаҳам дониста мешаванд.

Дар қарори додгоҳ омада, ки Нетаняҳу ва Галлант дидаву дониста аҳолии осоиштаро дар Ғазза аз хӯроку обу дору маҳрум карданд.

Ҳанӯз вокуниши раҳбарони Исроил маълум нест.

Нахуствазири собиқи Исроил Нафталӣ Бенетт ин қарорро “як шармандагӣ барои Додгоҳи байнулмилалӣ” номид. Раҳбари мухолифони Исроил Яйр Лапид ҳам онро маҳкум кард ва гуфт, ки қарори додгоҳ “мукофот барои терроризм” аст.

Исроил ва мақомоташ қонунмандии Додгоҳи байнулмилалиро эътироф намекунанд ва ҳам иттиҳоми ҷинояти ҷангиро дар Ғазза рад кардаанд.

Мақомоти Исроил қаблан гуфта буданд, ки Муҳаммад Зайф, фармондеҳи «Ҳамос» дар як ҳамлаи ҳавоӣ кушта шудааст, вале ин гурӯҳи тундрав ҳеч гоҳ хабарро рад ё тасдиқ накард.

Вокуниши “Ҳамос” ба ҳукми Додгоҳи байнулмилалии ҷиноӣ то ин лаҳза расонаӣ нашудааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube