100 нусха китоби «Ислом ва экология» ба Маркази исломии Тоҷикистон супорида шуд

Бо мақсади баланд бардоштани сатҳи огоҳӣ оид ба масъалаҳои экология ва рушди устувор, Кумитаи ҳифзи муҳити зисти назди Ҳукумати Ҷумҳурии Тоҷикистон дар якҷоягӣ бо Кумитаи дин, ба танзим даровардани анъанаҳо, ҷашнҳо ва маросимҳои назди Ҳукумати Ҷумҳурии Тоҷикистон дастури роҳбарикунандаи «Ислом ва экология» — ро нашр намуд.

Дар ин бора «Ховар» иттилоъ медиҳад.

Интиқоли китоб дар ҷараёни мулоқот бо раиси Шӯрои уламои маркази исломии Тоҷикистон Саидмукаррам Абдуқодирзода сурат гирифт. Дар доираи мулоқот намояндагони Кумитаи ҳифзи муҳити зист роҳҳои татбиқи сиёсати ҳукумати Ҷумҳурии Тоҷикистон дар соҳаи ҳифзи муҳити зист, инчунин ташаббусҳои глобалии президенти Тоҷикистон Эмомалӣ Раҳмонро дар соҳаи захираҳои об ва иқлим баррасӣ намуданд.

Саидмукаррам Абдуқодирзода қайд кард, ки нашри китоби «Ислом ва экология» ба густариши шуури экологӣ дар ҷомеаи Тоҷикистон мусоидат намуда, ба барқарор кардани робита байни таълимоти динӣ ва мушкилоти муосири экологӣ мусоидат мекунад.

Ин ташаббус ба рушди маърифати экологӣ, инчунин таҳкими робитаи арзишҳои маънавӣ ва экологӣ дар Тоҷикистон равона шудааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube