1,2 млн сомонӣ ҷаримаи волидайни бемасъулият

Барои нақзи Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” наздики 9,8 ҳазор парвандаи маъмурӣ ба баррасӣ гирифта шудааст.

Дар ин бора раиси Суди Олии Тоҷикистон Шермуҳаммад Шоҳиён зимни нишасти матбуотӣ иттилоъ дода, афзуд, ки шумораи парвандаҳои баррасишуда барои нақзи меъёрҳои қонуни мазкур нисбати ҳамин давраи соли гузашта 430 адад кам шудааст.

Шоҳиён иттилоъ дод, ки дар давоми нимсола аз рӯи 8,8 ҳазор парванда нисбати бештар аз 8,8 ҳазор нафар қарор қабул гардидааст.

Дар мавриди чигунагии ҷазо Шоҳиён изҳор дошт, ки дар нисбати қариб 3,2 ҳазор нафар ҷазои огоҳӣ ва нисбати қариб 5,7 ҳазор ҷарима татбиқ гардидааст.

Ҳаҷми ҷаримаҳое, ки судҳо нисбати волидони бемасъулият татбиқ кардаанд, наздики 1,2 млн сомонӣ арзёбӣ гардид. Зикр гардид, ки ҷавобгарии маъмурӣ барои бемасъулиятӣ дар тарбияи фарзанд огоҳӣ ва ё ҷарима аз 3 то 5 нишондиҳанда барои ҳисобҳо пешбинӣ шудааст.

Раиси Суди Олӣ таъкид намуд, ки тибқи қонуни асосӣ низ падару модар масъуланд барои таълими фарзанд, инкишофи маънавӣ, ҷисмонӣ ва руҳияш шароит фароҳам оваранд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube