Толибон Шерхон – Бандарро гирифтанд

Толибон гузаргоҳи гумрукиву тиҷоратии Шерхон-Бандарро бидуни ягон даргирӣ гирифтаанд. Ин гузаргоҳ  дар сарҳади  Тоҷикистону Афғонистон ҷойгир аст.

Бино ба иттилои Аҷмал Кокар, хабарнигори хабаргузории  «Пажвок»  ба «Азия-Плюс», «Толибон» чанд соат пеш Шерхон- Бандарро суқут додаанд ва бархе аз неруҳои давлатии Афғонистон ба дасти «Толибон» таслим шуда,  бархеи дигар аз ин неруҳои давлатӣ ба ҷониби Тоҷикистон паноҳ овардаанд. Гуфта мешавад, дар миёни паноҳовардаҳои ҷониби Афғонистон бархе аз мақомдорони маҳаллӣ низ ҳастанд.

Ҳоло мақомоти расмии Тоҷикистон  дар ин маврид расман изҳори назар накардаанд.

Гузаргоҳи гумрукии  Шерхон- Бандар дар дарёи Панҷ, наздик ба марзи  Тоҷикистон ҷойгир  мебошад. Ин гузаргоҳи марзӣ як масири асосии транзитие мебошад, ки Афғонистон ва Покистонро бо Тоҷикистон ва Қирғизистон мепайвандад. Ҳар рӯз даҳҳо мошини боркаш аз ин бандар мегузарад, ки аксари онҳоро ронандагони тоҷик идора мекунанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube