4 рӯзи маҳдудияти ҳаракати воситаҳои нақлиёт дар вилояти Суғд

Вобаста ба сафари Президенти Тоҷикистон Эмомалӣ Раҳмон ба баъзе шаҳру ноҳияҳои вилояти Суғд, аз 5 то 8-уми июл ҳаракати нақлиёт дар роҳҳои ин минтақа маҳдуд карда мешавад.

Бино ба иттилои ШБДА дар вилояти Суғд, нақшаи маҳдудияти ҳаракати воситаҳои нақлиёт ҳангоми ташрифи меҳмонон эълон гардида ва дар вақтҳои алоҳида ҷорӣ карда мешавад.

Зикр мегардад, ки имрӯз, 5-уми июл ҳаракати воситаҳои нақлиёт дар роҳи автомобилгарди Айнӣ — Панҷакент, кӯчаҳои марказии ҷамоати Урметани ноҳияи Айнӣ, шаҳраки Суғдиён то деҳаи Филмандари шаҳри Панҷакент маҳдуд карда мешавад.

6-уми июл ҳаракати нақлиёт дар кӯчаҳои марказии шаҳри Гулистон, роҳи автомобилгарди Хуҷанд — Бобоҷон Ғафуров, кӯчаҳои Исмоили Сомонӣ — Рифъат Ҳоҷиев — 25-солаги Истиқлол — Султон Умаров — Сирдарё то тавалудхонаи шаҳри Хуҷанд, давраи Ором, ҷамоати Дадобой Холматов то шаҳри Гулистон маҳдуд мегардад.

7-уми июли соли 2023 ҳаракати нақлиёт дар кӯчаҳои марказии ноҳияи Мастчоҳ, ҷамоатҳои Навбунёд, Полдорак, Оббурдон то деҳаи Мастчоҳи ноҳияи Мастчоҳ маҳдуд мешавад.

8-уми июли соли 2023 ҳаракати нақлиёт дар кӯчаҳои марказии шаҳри Гулистон — роҳи автомобилгарди Хуҷанд — Бобоҷон Ғафуров, кӯчаҳои Гагарин — Бобоҷон Ғафуров то маҳаллаи Нави шаҳри Бӯстон, кӯчаҳои Исмоили Сомонӣ — Солеҳ Раҷабов ва Раҳмон Набиеви шаҳри Хучанд маҳдуд карда мешавад.

ШБДА дар вилояти Суғд аз сокинон ва шаҳрвандон хоҳиш кардааст, ки ҳангоми маҳдуд шудани ҳаракат дар мавзеъҳои зикргардида ҳаракати худро тариқи кӯчаҳои ҳамшафат идома диҳанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube