А. Равшанов: Барои намоиши филми 40 ҳазор сомониям толори арзон диҳед!

Алишер Равшанов- актёр ва муаллифи се филми хусусии тоҷикӣ, имрӯз 30-юми июн дар сӯҳбат бо мо гуфт, ки филми навбатияш «Меҳмони нохонда» дар арафаи вироиш қарор дорад, қариб 90% кори он ба анҷом расидаасту танҳо овоздиҳияш мондааст:

— «Меҳмони нохонда» дар жанри комедия ба навор гирифта шуда, аз ҳаёти духтаре қисса мекунад, ки мудом ба ҳаводиси нохуш (приключения) рӯ ба рӯ гардида, ҳатман ба ягон балое дучор мешавад. Азиза, қаҳрамони ин филм бояд барои ба итмом расонидани кори дипломияш ба хориҷи кишвар- Москва равад. Дар роҳ мувофиқи фармони падараш ба хонаи доя- пиразане, ки ӯро бо сабаби ятим буданаш парвариш намудааст, меҳмон мешавад. Саҳар дар хоб монда, аз парвоз дер мемонад ва ба мулозимаш мефармояд. ки мошинашро ба хона бурда,  ба падараш гӯяд, ки Азиза сиҳат саломат ба Маскав парид, худ бошад боз ба хонаи дояаш бармегардад. Дояаш наберае дорад, бо номи Гургалӣ , ки дар натиҷаи садамаи автомобилӣ майнаи сараш осеб дида, каме аз ақл бегона шудааст. Дар ҳамин раванд дӯсти Гургали Ҷамшед низ меҳмони ин хонадон мешавад ва Азиза, қаҳрамони мо дар байни ду ҷавони ноқисулакл маҷбур аст, ки як моҳ тоқат намояд.

  Хулоса ин филм пур аз тазоду бархурдҳо буда, мутобиқ ба зиндагии бештари духтарони эркатулфори ин замона аст».

Бобати буҷаи филм бошад, Алишер гуфт, ки буҷаи филм бештар аз 40 ҳазор сомониро ташкил медиҳад.

«Меҳмони нохонда»-и Алишер номи «забонзада» буда, чанд сол қабл киномотографони Русия филм-комедияеро айнан бо ҳамин ном- «Незванный гость» сабт намуда буданд. Аммо Алишер мегӯяд, ки сенарияи филми ӯ ягон рабте ба сенарияи русҳо надорад:

— «Незванный гост» бобати «приключения»-ҳои тӯй қисса мекунад, «Меҳмони нохонда»-и мо бошад, дар бораи саргузашти духтаре, ки ҳамеша ба ҳаводиси нохуш рӯ ба рӯ меояд. Аслан сармашқи кори мо ин панди Ҳунарманди халкии Тоҷикистон Марям Исоева мебошад:

« Агар ту шеъри Мирзо Турсунзодаро бо тамоми ҳиссиёт қироат кунӣ, ин маънои онро надорад, ки ту Мирзо Турсунзода ҳастӣ». Ин сухан он маъноро дорад, ки ҳарчанд  филмро дар сатҳи олӣ ҳам ба навор гирӣ, чун маҳсули тахайюли дигар кас аст, ҳеҷ гоҳ бо номи ту сабт нахоҳад гардид.

Филми «Меҳмони нохонда» аз сӯйи Алишер Равшанов дар ҳоле муаррифӣ мегардад, ки мавсуф соли 2011 филми пурмоҷароеро бо номи «20- рӯзи боигарии ман» таҳия намуда, аз ҷониби мунаққидон ба танқиди шадиде дучор гардида буд:

« Воқеан ҳам «20-рӯзи боигарии ман» аз ҷониби мунаққидон ба танқиди шадид дучор гардида буд. Вақте, ки танқидҳо зиёд шудан гирифт, ман ҳамаи онҳоеро,ки аз корам норозӣ буданд, ба «Радиои Ватан» ба пахши мустақим даъват намудам, ки биёянд рӯ ба рӯ сӯҳбат кунем. Ман он ҷо мехостам аз эшон пурсам, , ки дар ҳоли ин қадар дағ-даға карданашон, барои пешрафти кинои пасошӯравии мо чӣ карданд? Оё ягон бор ба мо маслиҳат доданд, ки ана ин ҷои сенарияро дигар кунед? Ё ягон кас якуякбора зинаи якумро набаромада, ба даҳум зина баромадааст? Хулоса саволҳои ман ба мунаққидон зиёд буд, аммо ягон нафари онҳо ба пахши мустақим ҳозир нашуданд.

  Бале, « 20-рӯзи боигарии ман» камбудиҳои зиёд дошт, аммо он кори аввалини мо буд. Бо он ҳама камбудиҳояш дар ҳамон сол буҷаи филми мо 20 ҳазор доллари ИМА-ро ташкил намуда буд. Баъд ин ки рӯнамоии филмро мо дар «Кохи борбад» ба роҳ мондем, дар ҳоле ки ҳатто то имрӯз кам андар кам филмҳое ҳастанд, ки маҳз дар ҳамин толори гаронарзиштарини кишвар рӯнамоӣ шудаанд».

Дар охир Алишер бобати камбудиҳои филмофарии тоҷик, хусусан филмҳои хусусӣ чунини ибрози ақида намуд:

— Бисёриҳо камбудро асосан дар маблағ мебинанд, ки то андозае ин ақида дуруст ҳам ҳаст. Чун дар замони ҳозира бе пул ҳатто қадам задан намешавад. Аммо барои шахсан ман ва гурӯҳи мо маблағ мушкилот нест. Медонед, мушкилоти асосӣ дар чист? Дар он ки моро пешпоя надиҳад, монеаҳо дар корамон эҷод накунанд, барои мо бас аст. Агар тавонанд, кӯмак кунанд, кӯмакӣ молӣ не. маслиҳат диҳанд, шуд. Ва хуб мешуд агар мисли дигар давлатҳо, масалан Ӯзбекистон иҷораи техникаҳои филмбардориро 50%-а кунанд, агар не, лоақал иҷораи толоррро 50 % кунанд, зеро нархи он барои мо хеле қиммат аст. Худатон як фикр кунед, мо ҳамаи масрафро аз кисаи худамон медиҳем ва он ҳам барои пешравию рушди фарҳанги миллатамон. Охир кино ва варзиш ин ду чизе ҳастанд, ки дар баробари армияи пурзур муаррифгари миллатанд. Хориҷиён, мардуми оддии дигар мамолик,  маҳз тавассути филмҳо то кадом андоза пешрафта будани давлатро баҳо медиҳанд. Мо хуб медонем, давлатҳои зиёдеро, ки вазъи иҷимоияшон басо муташаниҷ аст, аммо дар киномотография пешдаст, ки ҳастанд, миллаташонро, давлаташонро бо вуҷуди камбудиҳои зиёд дар сатҳи олӣ муаррифӣ мекунанд.

Фарангиси Фармон

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube