Амонатбонк ғолиби “Мусобиқаи байнибонкӣ 2024 оид ба футбол” шуд

​Аз ҷониби Федератсияи футболи Тоҷикистон бахшида ба 30-юмин солгарди Рӯзи Конститутсияи Ҷумҳурии Тоҷикистон “Мусобиқаи байнибонкӣ 2024 оид ба футбол” миёни ташкилотҳои қарзии кишвар доир гардид.

Дар мусобиқаи мазкур 12 дастаи пурқуввати футболбозон, ки ба ду гуруҳ ҷудо шуда буданд, миёни ҳам рақобат намуда, аз он 8 даста ба чоряк финал баромаданд. Дар марҳилаи плей-офф, бозӣ бо системаи олимпӣ доир гашт.

​Барои ҷои сеюм дастаи футболбозони “Эсхата” бо “Душанбе сити” байни ҳам рақобат намуда, бозӣ ба манфиати дастаи “Эсхата” бо ҳисоби 6:3 анҷом ёфт.

​Дар бозии финалӣ бошад, дастаи футболбозони “Ориёнбонк” ва “Амонатбонк” ба майдон баромада, ягона голро футболбози дастаи “Амонатбонк” Манучеҳр Шарипов дар дақиқаи 47-уми бозӣ ба дарвозаи ҳариф зад.

​Ҳамин тавр, бозӣ ба манфиати дастаи футболбозони “Амонатбонк” бо ҳисоби 0:1 анҷом ёфта, дастаи футболбозони ин бонк ғолиби “Муосбиқаи байнибонкӣ 2024 оид ба футбол” миёни ташкилотҳои қарзии кишвар гардид.

Дар охири мусобиқа дарвозабони беҳтарин Муминзода Умедҷон ва бозингари беҳтарин Мирзоев Султоншо аз дастаи “Амонатбонк” дониста шуданд.

Ба ғолибони ҷои якум “Амонатбонк”, ҷои дуюм “Ориёнбонк” ва ҷои сеюм “Эсхата” дар вазъияти тантанавӣ медал ва туҳфаҳои пулӣ тақдим карда шуд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube