Асад дар Маскав. Сарнавишти Сурия чӣ мешавад?

Башор Асад, президенти ҳамакнун собиқи Сурия дар Маскав пас аз таслими ҳукуматаш ба мухолифин аз кишвар фирор ва дар Русия  паноҳандагӣ дарёфт кардааст. 

ТАСС рӯзи 8 декабр навишт, ки ки «Асад бо аъзои хонаводааш ба Маскав расид. Русия ба далели башардӯстона ба онҳо паноҳандагӣ дод”.

Мухолифини Асад, ки ҳукумати 24-солаи ӯ ва низоми 53-солаи хонаводаашро сарнагун карданд, ба воситаи телевизиони давлатии Сурия гуфтанд, ки «Димишқ аз Асад озод шуд».

Ёдовар мешавем, ки аз соли 1971 хонаводаи Асад Сурияро роҳбарӣ мекунанд, то соли 2000-ум падараш Ҳафиз Асад ва аз 24-соли охир Башор Асад президенти ин кишвар буданд. Кишварҳои ғарбӣ ва мухолифин хонаводаи Асадро ба худкомагӣ, қатли шаҳрвандон ва дигар ҷиноятҳои низомиву сиёсӣ гунаҳгор медонанд. 

Сарнагун кардани низоми Башор Асад дар Сурия 27 ноябр оғоз шуд. Гуруҳи “Таҳрир аш-Шом” аввал вилояти Ҳалаб, сипас Ҳамову Ҳумс ва ахиран 8-уми декабр вориди Димишқ шуданд.

Шабакаи Аl-Mayadeen бо истинод ба хабаргузории Ройтерз хабар дод, ки гурӯҳҳои мусаллаҳ бидуни бархурде аз артиши Сурия вориди Димишқ шудаанд.

 “Таҳрир-аш-Шом” баъди тасарруфи Димишқ эълон кард, ки Муҳаммад Ғозӣ Ал-Ҷалолӣ то замони ба таври расмӣ интиқоли қудрат ба созмонҳо ва вазоратхонаҳо раҳбарӣ мекунад.

Ал — Ҷалолӣ, сарвазири Сурия гуфт, ки омода аст бо ҳар касе, ки мардуми Сурия интихоб кунанд, ҳамкорӣ кунад.

Аҳмад ал-Шаро ё Абӯмуҳаммад ал-Ҷулонӣ, раиси “Таҳрир аш-Шом” (собиқ “Ҷабҳаи ан-Нусра”), ки худро фармондеҳи утоқи амалиётии мухолифони Сурия меномад, аз мардуми Сурия хостааст, ки то таҳвили расмӣ зери роҳбарии нахуствазир ба муассисаҳои ҳукумат наздик нашаванд.

Сарнавишти Сурия чӣ хоҳад шуд? Ба ин савол дар шумораи навбатии ҳафтаномаи “Тоҷикистон” посух ҷӯед!

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube