Ба 165 ҳазор оилаи камбизоат 500 сомонӣ кумакпулӣ дода мешавад

То охири соли 2021 ба 165 ҳазор хонаводаҳои камбизоати Тоҷикистон 500 сомонӣ кумакпулӣ дода мешавад. Дар ин бора Вазорати тандурустӣ ва ҳифзи иҷтимоии аҳолии ҷумҳурӣ хабар медиҳад.

Гуфта мешавад, имсол бо Бонки ҷаҳонӣ “Оид ба маблағгузории дуюми иловагӣ барои “Лоиҳаи фавқулоддаи муқовимат ба вируси COVID-19 дар Тоҷикистон” Созишномаи дуюми иловагӣ ба имзо расид. Тибқи нақша он 165 ҳазор хонаводаҳо (оилаҳо)-и камбизоатро фаро хоҳад гирифт, ки ҳаҷми умумии маблағгузорӣ 82,5 млн. сомониро ташкил мекунад.
Бино ба маълумоти Вазорат, дар марҳилаи аввал, яъне аз моҳи июни соли 2020 то моҳи апрели соли 2021 кумакпулии якдафъаинаи иҷтимоӣ ба андозаи 500 (панҷсад) сомонӣ ба ҳудуди 70 оилаҳои камбизоат, ки дар ҳайати худ кудакони синни то 3 сола доранд, расонида шуд.

Ҳамин тавр, дар моҳи августи соли ҷорӣ ба 84 ҳазор оилаҳои камбизоат, ки дар ҳайати худ кӯдакони синни то 7-сола доранд, моҳи сентябр-октябри соли ҷорӣ — ба 56 ҳазор оилаҳои камбизоати дорои кӯдакони хурдсол, инчунин оилаҳое, ки занҳо сардори оила буда, дар ҳайати худ кӯдакони синни аз 7 то 16-сола доранд, дар моҳи ноябр-декабри соли ҷорӣ — ба 25 ҳазор оилаҳои камбизоат, ки дар ҳайати худ кӯдакони маъюби синни то 18-сола доранд, кумакпулӣ дода шуд.

Директори Агентии давлатии ҳифзи иҷтимоии аҳолӣ Абдулҳаким Холзода ба “Азия-Плюс” шарҳ дод, ки кумакпулии молиявӣ барои киҳо таъин шудаасту чӣ гуна метавон онро гирифт.

Ба гуфтаи ӯ, мувофиқи тавсияҳои Бонки ҷаҳонӣ, кумакпулии якдафъаина ба оилаҳое расонида мешавад, ки дар пойгоҳи ягонаи иттилоотии Агентии ҳифзи иҷтимоӣ ба сифати гирандагони кумакҳои унвонии иҷтимоӣ сабти ном шудаанд.

Барои гирифтани кумак шахси ниёзманд бояд ба кумитаи маҳал, ҷамоат ё Раёсати манзилию истифодабарӣ ариза навишта, чунин ҳуҷҷатҳоро пешниҳод намояд:
— маълумотнома (справка) дар бораи таъини кумаки унвонии иҷтимоӣ;
— маълумотнома дар бораи даромад ва амволи аъзои оила;
— маълумотнома дар бораи ҳайати оилаи аризадиҳанда;
— нусхаи шиносномаҳои аъзои калонсоли оила, шаҳодатномаҳо дар бораи таваллуди фарзанд, ҳуҷҷати тасдиқкунандаи корношоямӣ (агар дар оила шахси маъюб бошад).

Варақаҳои намунаи тарзи пур кардани ҳуҷҷатҳои зикршуда бепул дар кумитаҳои маҳал, ҷамоат ё Раёсати манзилию истифодабарӣ дода мешаванд.
Сипас ин маълумот дар бахши ҳифзи иҷтимоии аҳолии ҳокимиятҳои иҷроияи маҳаллӣ ба компютер ворид карда мешавад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube