Бадахшон: Кормандони милитсия ба ҳашар баромаданд (аудио)

Давоми рўзҳои истироҳатӣ кормандони Раёсати Вазорати корҳои дохилӣ дар Вилояти Мухтори Куҳистони Бадахшон дар тозаву озода намудани муҳити зист дар як маҳаллаи шаҳри Хоруғ сафарбар карда шудаанд.

Бино ба иттилои Раёсати ВКД дар Вилояти Мухтори Куҳистони Бадахшон, давоми рўзҳои гузашта ҷиҳати саривақт шодоб гардидани кўчаҳои маҳаллӣ бо иштироки кормандони милитсияи Бадахшонзамин дар канали маҳаллаи Шош Хоруғи поён ҳашари дастаҷамъона баргузор гардидааст.

— Ҳайати шахсии Раёсати Вазорати корҳои дохилӣ ва ҷузъу томҳои он дар ВМКБ дастаҷамъона ба ҳашар баромада, ба тозаву озода намудани минтақаҳои хизматӣ, маҳаллаҳо, ҷӯю наҳрҳои обгузар, муҳити атроф аз ҳар гуна партовҳои маишӣ ва сарсабзу хуррам намудани ҳудуди  шаҳру навоҳӣ камари ҳиммат бастанд. Кормандони милитсия дар баробари гулшинонӣ ва кабудзоркунии гирду атрофи бинои маъмурӣ ва маҳаллаҳо инчунин ба тоза намудани канали калони обёришаванда дар мавзеи Андарстез, канали Шош Хоруғи поён, ки дохил ва атрофи масофаи наздик ба 400 метри онро ҳаргуна регу қум ва сангпора,  шохаҳои дарахтон ва партовҳои маишӣ пур намуда буд, тоза карда, барои таъмини аҳолӣ бо оби ошомиданӣ ва полезӣ саҳми босазои худро гузоштанд,- меафзояд манбаъ.

Гуфта мешавад, ки бо супориши роҳбарияти Раёсати ВКД дар ВМКБ кормандони мақомоти корҳои дохилӣ ҳар ҳафта ба ҳашари умумӣ баромада, барои тозагӣ ва анҷом додани корҳои ободонию бунёдкорӣ саҳм мегузоранд.

Хабарҳои моро дар Телеграм пайгирӣ намоед: https://t.me/tojikistontimes

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube