Беш аз 3220 медал. Дастоварди бесобиқаи варзишгарони Хатлон

Варзишгарони вилояти Хатлон дар соли 2022 аз иштирок дар мусобиқаҳои гуногуни варзишӣ соҳиби 3 ҳазору 226 медал гардидаанд. Дастоварди варзишгарон назар ба солҳои қаблӣ бештар шудааст.

Қурбонзода Қурбоналӣ — сардори Раёсати кор бо ҷавонон ва варзиш дар вилояти Хатлон имрӯз, 6-уми феврал дар нишасти матбуотии хеш гуфт, ки танҳо аз иштирок дар 29 мусобиқаи варзишӣ дастпарварони муассисаҳои варзишӣ 164 медал ба даст овардаанд. Ӯ афзуд, ки аз ин 53 медали тилло, 41 нуқра ва 70 медали биринҷӣ мебошад.

«Варзишгарони мо дар соли 2022 аз иштирок дар мусобиқаҳои гуногун 1 ҳазору 101 медали тилло, 959 нуқра ва 1 ҳазору 166 медали биринҷиро сазовор шуданд. Ин ҳама дастовард аз таъмини шароит барои тамрин ва ҷалби бештари ҷавонон ба варзиш аст. Ҳоло дар шаҳру ноҳияҳои вилояти Хатлон 34 муассисаи варзишӣ фаъолият дошта, беш аз 17 ҳазор ҷавонон ба тамрин ҷалб шудаанд»,- афзуд ӯ.

Машраби АЛОВИДДИН

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube