Бобоҷони Амонуллоҳ мухлисонашро бо чӣ қоил карданист? (Видео)

Даричаи ошноӣ:

Бобоҷони Амонуллоҳ 1-уми январи соли 1989 дар шаҳри Панҷакент дар оилаи соҳибкор ба дунё омадааст. Хатмкардаи  мактаби мусиқии ба номи  Малика Собирова ва Консерваторияи миллӣ аст.

Бо дархости мухлисонаш мо тасмим гирифтем, ки бо ин  ин ҷавони боистеъдод сӯҳбат ороем.

-Бобоҷон шуморо мухлисонатон ба озмуни “Оҳанги ҷавонӣ” пешниҳод намуданд. Мехоҳед дар озмун ширкат варзед?

-Наход мухлисон маро ба озмун пешбарӣ намоянду ман не гӯям?! Бо ҷону дил иштирок мекунам.

-Агар махфӣ набошад, бигӯед, ки бо кӯмаки кӣ ба саҳнаи калон роҳ ёфтед ва аввалин барномаи консертии худро баргузор намудед?

-Кӯмаки молӣ аз ҷониби падарам буд, аз нигоҳи маънавӣ бошад, шоҳсутуни санъати тоҷик, устод Ҷӯрабеки Мурод, маро дастгирию роҳнамоӣ карданд. Иштироки ин шахси номдор дар барномаи консертиам барои мани навроҳ беҳтарин тӯҳфа буд.

-Аз ҳарфҳоятон аён аст, ки сар-сарӣ не, аз сидқи дил ба санъат дилбастагӣ ва меҳру муҳаббат доред, агар махфӣ набошад, бигӯед, ки шавқу ҳаваси овозхонӣ дар дили писари тоҷир аз куҷо пайдо шуд?

-Ин чиз дар ботини ман аз шири модар сабзида, ирсӣ аст гӯям, хато намешавад, чунки модарам бисёр овози ширину марғуладор доранд. Ман ба авлоди модариам рафтаам, ҳама хешу табори модарам волаю шефтаи санъат ҳастанд ва ҳамин ки якҷоя ҷамъ шуданд, ба рақсу бозӣ медароянд.

-Бовар кунем, кӣ Бобоҷон ба мисли баъзе сарояндаҳои ҷавон бо кӯмакӣ табибони ЛОР  соҳиби овоз нашудааст?

-(Механдад) Ман ҳам инсонам ва мешаванд ҳолатҳое, кӣ гулӯдард шуда ба назди яке аз беҳтарин духтурони ҷумҳуриамон, муаллима Мушаррафа, ки ҳамсари устод Ҷӯрабек Муродов ҳастанд, меравам. Вале аслан овозам неъмати худодод аст.

-Баъзеҳо шеваи сурудани шуморо ба Афзалшоҳи Шодӣ монанд мекунанд ва ҳатто он касро устоди шумо мегӯянд, рост аст?

-Албатта устод Афзалшоҳ болои ман ҳаққи устодӣ доранд, вале дар мавриди  шеваи сурудан, ман кайҳо сабку равияи хоси хешро пайдо кардаам.

—Шумо бештар таронаҳои классикӣ месароед. Мехостем назаратонро ба реп ва эстрада бидонем…

-Бисёриҳо нисбати РЭП назари манфӣ доранд, вале ман бар он ақидаам, ки рэп аслан чизи хуб аст, ба шарте, ки рэпсаро аҳли маънӣ бошад ва камбудиҳои мавҷударо дар сурудҳояш нишон дода тавонад.  Дар якҷоягӣ дуэт хондани рэпсаро ва сарояндаи эстрада ба ман хеле писанд аст ва ҳатто сурудани чунин як таронаро дар нақша дорам.

-Дуэт гуфтеду ба хотирам омад, ки шумо бо Ғолибҷони Юсуф дуэт бо Афзалшо ва Ғолибҷон трио сароидаед, ки хеле хуб баромадааст. Барои ман як чиз аҷиб аст, ки чаро Бобоҷон бо ягон хонуми сароянда дуэт намесарояд? Магар аз янга метарсед?

-Намехостам инро ошкор намоям, вале аз шумо, журналистон ягон чизро пинҳон карда намешудааст. Ман бо ду хонуми сароянда дуэт тайёр када истодаам ва худо хоҳад рӯзҳои наздик маҳсули эҷодамонро ба мухлисон пешкаш менамоям.

-Бо киҳо?

-Ана инашро намегӯям. Бигзор барои мухлисон сюрприз шавад.

-Медонам, ки шумо низ мисли дигар сарояндаҳо ба тӯю маъракаҳо меравед. Ҳаққи хизмати Бобоҷон чанд аст?

-Барои дӯстон бе пул. Аслан, ман ба ҳунарам нарх намегузорам, соҳибҷашнҳо чӣ қадаре, ки ҳиммат кунанд. Ба тамоми минтақаҳои Тоҷикистон меравам. Мардум бо дарназардошти хароҷоти роҳ ва шумораи мутрибоне, ки ҳамроҳам мераванд, ҳаққи хизмати моро пардохт менамоянд.

-Ҳар инсон дар дил аз чизе ҳарос дорад. Бобоҷон аз кӣ ё чӣ метарсад?

-Ба ҷуз худованди мутаъол аз ягон бандаи хокӣ наметарсам, вале аз парвардигор хоҳиш мекунам, ки маро аз тӯҳмати ногаҳон, аз дӯсти бетамиз ва аз хешу табори нотавонбин дар паноҳаш нигоҳ дорад.

-Чаро аз душман нею аз хеш?

-Хеши нотавонбин аз душмани қаттол бадтар аст, чунки ҷойҳои сусти туро хуб медонад ва чунон зарба мезанад, ки нафаҳмида мемонӣ.

-Бобоҷон, эҳсос мекунед, ки аз мӯд қафо монда истодаед?

-Сару либосамро дар назар доред?

-Не, имрӯзҳо дар хориҷа клип кардани суруд мӯд шудааст…

-Мақсадатонро фаҳмидам. Барои сабти клип дар давлатҳои хориҷӣ  маблағи калон лозим аст. Ман чунин имконият надорам.

-Гуфтаниед, ки Бобоҷони Амонуллоҳ сарпараст надорад?

-Надорам.

—Умедворем, ки пас аз чопи ин суҳбат ягон марди баномус пайдо шуда, шуморо ба зери қаноти худ мегирад ва барои пешбурди ҳунаратон холисона кӯмак мерасонад.

-Кошкӣ чунин шавад!

-Бобоҷон, баъзе мухлисонатон, хоса намояндагони ҷинси латиф  мехоҳанд дар бораи зиндагии шахсии ҳунарманди дӯстдоштаашон маълумот пайдо намоянд…

-Ман оиладор ва соҳиби 5-фарзанд ҳастам. Шукри худо 2 духтарчаи гул барин зебою 3 шоҳписар дорам.

-Аз фарзандонатон санъаткорони ояндаро тарбият мекунед ё…?

-Мероси падар хоҳӣ, касби падар омӯз мегӯянд, вале ман намехоҳам, ки фарзандонам роҳи маро идома диҳанд.

-Худашон хоҳанд чӣ?

-Дар чунин ҳолат ҳам, маълумоти аввали фарзандонамро ман интихоб мекунам, сипас майлашон.

—Бобоҷон, агар дар озмун ғолиб биёед, чӣ кор мекунед?

-Худованд, агар мадад карда бахтам хандад, дар 7-рӯзи сафар 7 суруди нав эҷод намуда мухлисонамро қоил мекунам!

-Муваффақ бошед!

Суҳбаторо: Ш. Ниёзова

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube