Бохтар: Кохи фарҳангро ба номи Аловиддин гузоштанд
Кохи фарҳанг ва маркази иттилоотии шаҳри Бохтар ба номи Аловиддин Абдуллозода, Ҳунарпешаи халқии Ҷумҳурии Тоҷикистон номгузорӣ карда шуд. Ҳамзамон, муассисаи таълимии рақами 8-и шаҳри Бохтар ба номи Аслан Менеқулов номгузорӣ гардид.
Бо қарори иҷлосияи 13-уми Маҷлиси вакилони халқи шаҳри Бохтар даъвати шашум Кохи фарҳанг ва маркази иттилоотии шаҳри Бохтар ба номи Аловуддин Абдуллозода, Ҳунарпешаи халқии Ҷумҳурии Тоҷикистон номгузорӣ шуд. Аловиддин Абдуллозода 17-уми феврали соли 2022 дар шаҳри Бохтар даргузашт. Ӯ то вафоташ сардори Раёсати фарҳанги вилояти Хатлон буд.
Аловиддин Абдуллозода миёни дӯстдорони ҳаҷв ва кино шуҳрати зиёд дошт. Ӯ дар даҳҳо филмҳои ҳунарӣ ва намоишномаҳои театрӣ нақш офарида буд.
Ҳамзамон, бо қарори иҷлосияи 13-уми Маҷлиси вакилони халқи шаҳри Бохтар муассисаи таълимии рақами 8-и шаҳр ба номи Аслан Менеқулов гузошта шудааст. Аслан Менеқулов сокини шаҳри Бохтар буда, муассисаи таълимии мавриди назарро хатм кардааст. Ӯ дар вақти иҷрои вазифаи хизматӣ 14-уми сентябри соли 2022 дар муноқишаҳои марзӣ аз сӯи сарҳадбонони қирғиз кушта шуд. Марҳум соли 2021 баъди хатми муассисаи таълимии рақами 8 довталабона ба сафи Қувваҳои мусаллаҳи кишвар пайваста буд.
Дар ин бора аз Мақомоти иҷроияи ҳокимияти давлатии шаҳри Бохтар ба Pressa.tj иттилоъ доданд.
Машраби АЛОВИДДИН
Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube
Шарҳ