Боздошти марди гумонбар ба дуздӣ дар Душанбе

Раёсати ВКД дар шаҳри Душанбе аз боздошти марде хабар дод, ки ба дуздӣ гумонбар мешавад.

— Як нафар истифодабарандаи фаъоли шабакаҳои иҷтимоӣ бо нашри якчанд акс дар саҳифаи фейсбукии худ аз мақомоти милитсия дархост намуд, ки нисбати марди дар аксҳо инъикосёфта чораҳои қонунӣ андешида шавад. Ба иттилои номбурда, ин мард дар дохили нақлиёти мусофиркашони ҷамъиятӣ ба дуздии маблағҳои шаҳрвандон машғул аст,- афзуд манбаъ.

Бино ба иттилои манбаъ, оид ба ҳолати мазкур аз ҷониби кормандони Раёсати ВКД дар шаҳри Душанбе як қатор чорабиниҳои оперативӣ-ҷустуҷӯӣ гузаронида шуда, марди дар аксҳо инъикосёфта, шаҳрванд Каримов Қиёмиддин Муҳаммадисоевич, санаи таваллудаш 27.05.1974, сокини ноҳияи Хуросон дастгир ва ба мақомоти милитсия дастрас карда шудааст.

Гуфта мешавад, ки айни замон бо мақсади муайян намудани кирдорҳои ҷиноятии ӯ коркардҳои оперативӣ-санҷишӣ идома доранд.

Вобаста ба ин, Раёсати ВКД дар шаҳри Душанбе аз шаҳрвандон хоҳиш кардааст, ки агар аз ҷониби ин нафар мавриди дуздӣ қарор гирифтаанд, метавонанд ба мақомоти милитсия муроҷиат намоянд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube