Чаро аз бинӣ хун меравад?

Баробари гарм шудани ҳарорати ҳаво ҳолатҳои хунравӣ аз бинӣ бештар мушоҳида мешаванд. Саволе ба миён меояд, ки сабаби ин чист?

— Гарм шудани ҳаво ба ҳолати равонӣ ва ҷисмонии инсон таъсир мерасонад,- мегӯяд табиби ботаҷрибаи бачагон Собир Абдиев.- Чунки дар натиҷаи таъсири гармӣ кори бисёр узвҳои мо халалдор мегардад. Инсон худро беҳол эҳсос мекунад. Инчунин, дар ҳавои гарм ҳолатҳои хунравӣ аз бинӣ низ меафзояд, ки ин як қатор сабабҳо дорад. Масалан, дар натиҷаи аз ҳад зиёд асабонӣ шудан аз бинӣ хун меравад. Ҳангоми бисёр истеъмол кардани доруҳо низ хун тунук гардида, ҳолати хунравӣ мушоҳида мешавад. Чунин ҳолатро дар пиронсолҳо низ дидан мумкин аст. Баланд шудани фишори хун, сармохӯрӣ ҳам боиси хунравии бинӣ мегарданд.

Бино ба маълумоти мутахассисон, аз бинӣ замоне низ хун ҷорӣ мешавад, ки ба рагҳои хурди дохилии бинӣ осебе расад: зарба ба бинӣ, атсаи сахт кардан ҳангоми сармохӯрӣ, ангушт ба дохили бинӣ бурдан ва монанди инҳо. Мавридҳои ногаҳонии хунравӣ аз бинӣ мумкин аст шадид бошад, аммо маъмулан миқдори хеле ками хун аз он берун мешавад.

— Хунравӣ аз бинӣ ҳам меъёр дорад,- илова кард Собир Абдиев.- Дар аксар маврид тавассути хуншавии бинӣ хунҳои олудаи организм мебарояд. Бинобар ин, аз ин набояд ҳаросид. Мо бояд имкон диҳем, то хунҳои олуда берун раванд. Ҳамчун шифокор маслиҳат медиҳам, ки вақте аз бинӣ хун меравад, ҳеҷ гоҳ сарро ба ақиб напартоед. Хун ба ақиб рафта, гулӯгиру нафасгир карданаш мумкин аст. Ё хун ба роҳи нафасгирӣ шорида, дохили меъда мешаваду вазъро бадтар мекунад ва боиси дилбеҳузурӣ мегардад. Ғайр аз ин, бемории гайморит (варами пардаи луобии бинӣ) ҳам аз ҳамин сабабҳо ба вуҷуд меояд.

Вақте аз бинӣ хун ҷорӣ мешавад, моро зарур аст, ки андак ба қафо такя намуда, бо рӯймолча, коғази тоза ё пахта биниро аз ҷое, ки устухон нест, ба муддати 10 дақиқа бо дасти худ дорем. Ва ё нимаи болои танро каме баланд карда, ба бистар хобем ва ба бинӣ дока ё пахта гузошта, кӯшиш намоем, ки хунравӣ қатъ гардад. Бо гузашти 10 дақиқа дастро аз бинӣ мегирем. Агар хунравӣ қатъ нашавад, бори дигар, ба муддати 10 дақиқа нигоҳ медорем. Баъди ҷамъ 20 дақиқа бояд хунравӣ қатъ шавад. Агар хунравӣ қатъ нагардад, албатта ба духтур муроҷиат кардан лозим аст. Бояд гуфт, ки баъди манъи хунравӣ як муддат дароз кашида хобидан, аз ҳаракатҳои тез худдорӣ кардан, бинӣ наафшондан, хӯроки гарм нахӯрдан лозим аст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube