Дар шаҳри Хуҷанд нархи газ поин рафт (аудио)

Дар маркази маъмурии вилояти Суғд — шаҳри Хуҷанд пас аз соли нав нархи гази моеъ поин рафт. Як литри ин навъи сӯзишворӣ дар қиёс ба ҳафтаи гузашта 20 дирам арзон шудааст.

Имрӯз, 4-уми январи соли 2023 дар таблоҳои электронии нуқтаҳои фурӯши сӯзишвории шаҳри Хуҷанд як литр гази моеъ бо нархи 4,80-4,90 сомонӣ ба фурӯш гузошта шудааст, ки арзиши он дар охири сол 5,00-5,10 сомониро ташкил медод.

Нархи дигар навъҳои сӯзишворӣ дар сатҳи соли гузашта боқӣ мондааст. Бензини АИ 92 бо нархи 7,60 сомонӣ, АИ 95 — 8,00 сомонӣ ва сӯзишвории дизелӣ 12 сомонӣ фурӯхта мешавад.

Ёдовар мешавем, ки дар Тоҷикистон, тибқи иттилои расмӣ, беш аз 60 дарсади мошинҳо аз гази моеъ истифода мекунанд.