Дар «Тоҷи Сомон» кӣ соҳиби диплому ҷоиза шуд?

Дар «Кохи Суруш»-и шаҳри Душанбе маросими ҷоизасупорӣ ба ғолибони Синамоҷоизаи дуюми миллии «Тоҷи Сомон» таҳти шиори «Қадршиносии ҳунари асил» баргузор гардид.

Дар ҳамоиш синамогарон аз Эрон, Беларус, Озарбойҷон, Узбекистон, Қазоқистон ва Русия, меҳмонон ва дӯстдорони синамои тоҷик иштирок намуданд.

Имсол «Шоҳҷоиза»-и Синамоҷоизаи дуюми миллии «Тоҷи Сомон» насиби Муҳиддин Музаффар барои филми «Моҳӣ дар шаст» гардид.

Ҷоизаи «Беҳтарин филми мустанад» ба филми «Пайравони ҳақиқат»-и Рустам Шоазимов, «Беҳтарин филми тасвирӣ» ба филми «Зани порсо»-и Фирдавс Насруллозода, «Беҳтарин филми ҳунарӣ» ба «Дар талоши ҳақиқат»-и Манзаралӣ Шералӣ, «Беҳтарин филми дебют» ба филми «Фурӯғ»-и Одина Маҳмад, «Беҳтарин филми ҳунарии кӯтоҳ» ба филми «Модар»-и Нигина Раҷабова, «Беҳтарин коргардон» ба Рустам Отахонов барои филми «Танҳо ту», «Беҳтарин дизайн» ба Восеъ Набиев барои филми «Танҳо ту», «Беҳтарин наворбардор» ба Шуҳрат Қурбонов барои филми «Танҳо ту», «Таваҷҷуҳи тамошобин» ба филми «Ғам»-и Музаффар Шодиев, «Беҳтарин нақши кӯдакона» ба Зулайхои Абдуҳаким барои филми «Се хоҳарон», «Беҳтарин нақши занона» ба Таҳмина Раҷабова барои филми «Зиндагӣ зебост», «Беҳтарин нақши мардона» ба Насриддин Нуриддинов барои филми «Зиндагӣ зебост», «Беҳтарин коргардон» барои филми «Зиндагӣ зебост» ба Далер Раҳматов, «Беҳтарин танзим» барои филми «Мактаби мардонагӣ» ба Дилшод Раҳмонов дода шуд.

Ҷоизаи ифтихории Синамоҷоизаи «Тоҷи Сомон»- «Килки заррин»-ро барои «Беҳтарин филмноманавис» Абдурофеъ Рабизода соҳиб гардид.

Ҳамчунин барои иштирок дар ин синамоҷоиза ба филми «Ҳафт марвориди Шинг»-и Аслам Садриддин, «Ҳоло ки ман ҷавонам»-и Ғолибшо Мусоев, «Садои тамаддун»-и Тоҳир Асрориён, «Фарзанди фарзонаи миллат»-и Иззат Самадӣ, «Мавлоно»-и Далер Ҳасанзода ва филми «Ҳафткӯл»-и Шавкат Муҳаммадиев Дипломи Синамоҷоизаи дуюми миллии «Тоҷи Сомон» дода шуд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube