Дастаи олимпии ДМТ соҳиби мақоми аввал шуд

Дастаи олимпии Донишгоҳи милии Тоҷикистон дар олимпиадаи ҷумҳуриявӣ таҳти унвони «Хирад моро ба дониш раҳнамун аст…», ки миёни донишҷӯёни болаёқату соҳибистеъдоди муассисаҳои таҳсилоти олии касбии ҷумҳурӣ доир гардид, бо ишғоли 12 ҷойи ифтихорӣ мақоми аввалро соҳиб шуданд.

Гуфта мешавад, ки дар олимпиадаи ҷумҳуриявӣ аз 47 муассисаи таҳсилоти олии касбӣ намояндаи 42 муассиса бо теъдоди 470 нафар иштирок намуда, аз рӯйи 15 фанни таълимӣ байни ҳам сабқат карданд.

Олимпиадаи мазкур бахшида ба “Соли маърифати ҳуқуқӣ” роҳандозӣ гардида буд. Мақсад аз баргузории он таблиғи донишҳои назариявӣ, дарёфти истеъдодҳои ҷавон, инкишоф додани неруи ақлӣ, баланд бардоштани савияи дониш, маърифату ҷаҳонбинӣ ва сатҳи тафаккури донишҷӯёни муассисаҳои таҳсилоти олии касбӣ маҳсуб меёбад.

Дастаи олимпии ДМТ бо гирифтани 5 ҷойи аввал, 5 ҷойи дуюм ва 2 ҷойи сеюм, дар умум 12 ҷойи ифтихорӣ, миёни дастаҳои олимпӣ мавқеи аввалро касб намуд. Ҳамзамон, раёсати Донишгоҳ барои ишғоли ҷойи аввал соҳиби диплом гардид, ки аз ҷониби масъулини Вазорати маориф ва илми ҷумҳурӣ ба мутасаддии донишгоҳ супорида шуд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube