Донишҷӯёни Донишгоҳи техникӣ дар оромгоҳи Лучоб аксия гузарониданд

Як гуруҳ донишҷӯёни Донишгоҳи техникии Тоҷикистон дар оромгоҳи Лучоб аксияи тозагӣ гузаронидаанд.

Гуфта мешавад, ки ин аксия бо ташаббуси ректори донишгоҳ Қудрат Давлатзода ҷиҳати тоза намудани оромгоҳ аз ҳар гуна алафҳо ва нарм намудани бехи гулу дарахтон бо иштироки беш аз 80 донишҷӯ сурат гирифтааст.

“Донишҷӯён субҳи барвақти шанбе, 30-юми апрел ба оромгоҳи Лучоб омаданд. Аксияи экологӣ таҳти унвони «Ба гузаштагони худ арҷ мегузорем» баргузор гардид. Дар аксия беш аз 80 донишҷӯ — волонтёрони шуъбаи кор бо ҷавонон иштирок карданд. Масоҳати калони оромгоҳро ба пуррагӣ тоза намуданд”,- иттилоъ доданд аз донишгоҳ.

Инчунин, дар ҷараёни аксияи экологӣ майдонча ва роҳравҳои қабри як қатор арбобони илму техника, фарҳанг ва санъат, ходимони намоёни давлативу сиёсӣ аз алафҳои бегона ва дигар ашёҳо тоза карда шудааст.

Гуфта мешавад, ки чунин аксияҳои экологӣ бо дастгирии ректори донишгоҳ Қудрат Давлатзода минбаъд низ роҳандозӣ мегарданд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube