Дуздии корманди бонк

Вазорати умури дохилии Тоҷикистон як корманди филиали “Бонки Эсхата” дар шаҳри Душанберо боздошт кардааст.

Ба иттилои торнамои расмии ВКД, дастгиршуда 27 сол дошта, ба ҳайси нозири маркази хизматрасонӣ кор мекардааст: “Муайян карда шуд, ки номбурда, дар давраи фаъолияти кориаш санаи 16 сентябри соли 2017, аз хазинаи филиали бонк 27000 сомониро гирифта азони худ намуда, ба манфиати шахсиаш сарф намудааст”.

Манбаъ меафзояд, оид ба ин далел парвандаи ҷиноятӣ оғоз гардида, тафтишот идома дорад.

Қаблан, Додситонии кулли Тоҷикистон аз эълони ҳукми панҷ корманди филиали “Тоҷпромбонк” дар Шаҳринав хабар дод. Бар пояи иттилоияи Додситонии кулли Тоҷикистон, директори филиал Қурбонов С.Н. сармуҳосиб Тешаева С.Б., хазинадор Ғафуров И.С. коршиносони калони қарзии бонк Сафаров Х.Н. ва Ҳодиев Ф.Ҷ. аз соли 2013 то моҳи феврали 2016 бо маслиҳати пешакӣ пасандоз, маснуоти тилловорӣ ва маблағҳои пешпардохти мизоҷонро аз худ намудаанд. Ба иттилои манбаъ, дар натиҷа ин афрод ба “Тоҷпромбонк” дар ҳаҷми 188.000 доллар, 95.182 сомонӣ ва 278.738 рубли русӣ зарар расонидаанд. Бо қарори додгоҳ, Қурбонов 16 сол, Ғафуров И.С. 12, Ҳодиев Ф.Ҷ., Сафаров Ҳ.Н. 9 солӣ ва Тешаева С.Б. 8 солу 6 моҳ аз озодӣ маҳрум шудаанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube