Эҳтимоли рух додани заминларзаҳои аз 7 балл зиёд дар Тоҷикистон

«Минтақаи Тоҷикистон, гарчанде ки аз ҷиҳати сейсмикӣ фаъол ҳам бошад, дар 80 соли охир дар ҷумҳурӣ ягон маротиба заминларзаи аз 7 балл зиёд рӯй надодааст. Эҳтимоли рух додани заминларзаҳои аз 7 балл зиёд хеле ночиз аст. Он сарбандаҳое, ки дар минтақаҳои кӯҳистони Тоҷикистон сохта мешаванд, барои минтақа ягон хатар надоранд»,- иброз дошт президенти Академияи илмҳои Ҷумҳурии Тоҷикистон Фарҳод Раҳимӣ зимни Конфронси байналмилалии илмию амалӣ, ки имрӯз дар Душанбе ба кори худ оғоз кард. Конфронс таҳти унвони «Амнияти сейсмикӣ дар Осиёи Марказӣ» доир мегардад.
Тавре қаблан иттилоъ дода будем, Академияи илмҳои Ҷумҳурии Тоҷикистон бо мақсади ташкил намудани гуфтугӯи озод ва табодули назар байни олимон, мутахассисон ва ташкилотҳои байналмилалӣ оид ба амнияти сейсмикӣ дар Осиёи Марказӣ баргузории ин конфронсро ба нақша гирифтааст.
Фарҳод Раҳимӣ инчунин тобоварии сарбанди кўли Сарез бо баландии 567 метр ба заминларзаҳои рўйдодаро таъкид намуда, иброз дошт, ки аз чунин сарбандҳо ба аҳолӣ, махсусан ба аҳолии кишварҳои поёноб ҳеҷ гуна хатар таҳдид намекунад.
«Мо ба масъалаи тайёр намудани кадрҳо дар соҳаи сейсмология, сохтани шабакаи ягонаи сейсмикии Осиёи Марказӣ, табодули фаврии иттилоот ҳангоми рӯй додани заминларза ва мувофиқа намудани онҳо доимо таваҷҷуҳи хосса зоҳир менамоем»,-илова намуд перзиденти Академияи илмҳо.
Дар конфронс масъалаҳои амнияти сейсмикии сарбандҳои неругоҳҳои барқи обӣ дар минтақаҳои кӯҳӣ, гузаронидани мониторинги сейсмикӣ дар давлатҳои Осиёи Марказӣ, муттаҳид намудани неруи сейсмологҳои минтақа ҷиҳати паст намудани хатари заминларзаҳо дар кишварҳои ҳамҷавор, дурнамои таъсиси низоми ягонаи мушоҳидаҳои сейсмологии Осиёи Марказӣ, ҷалби донорҳои байналмилалӣ ба ҳалли масъалаҳои вобаста ба амнияти сейсмикӣ муҳокима гаштанд.
Иштирокчиёни конфронс доир ба бехатарии сохтмонҳои иҷтимоӣ ва шаҳрсозӣ нисбат ба заминларза ва то ҳадди имкон кам намудани хавфи онҳо ва таъмини амнияти сейсмикӣ ҳангоми банақшагирии сохтмонҳо дар шаҳрҳо (махсусан шаҳрҳои калон) табодули назар карданд.
Ҳамчунин дар конфронс намоишгоҳи технологияҳои нав дар самти сейсмология ва натиҷаҳои илмии олимони тоҷик ба маъраз гузошта шуд.
Бояд гуфт, ки дар кори конфронс беш аз 100 олими шинохтаи соҳаи сейсмология аз 16 кишвари дунё иштирок доранд.
Бегоҳии имрӯз зимни ҷамъбасти кори конфронс Баёнияи иштирокдорони он қабул карда мешавад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube