FIFA: Тоҷикистон се зина поин шуд!

Тоҷикистон дар раддабандии нави FIFA (Федератсияи байналмилалии футбол), ки 12 январ нашр шуд, се зина поин шуд ва дар байни 211 кишвар бо 231 имтиёз дар ҷойгоҳи 132-юм қарор гирифт.

Тоҷикистон дар байни 46 дастаи AFC (Конфедератсияи футболи Осиё) мақоми 21-умро касб кардааст. Дар Осиё Эрон дар ҷойи аввал (дар ҷаҳон 29-ум), Кореяи Ҷанубӣ дар ҷойи дувум (дар ҷаҳон 37-ум) ва Австралия дар ҷойи севум (дар ҷаҳон 44-ум) қарор доранд.

Мунтахаби Аргентина дар феҳристи нави ФИФА бо 1634 имтиёз дар ҷойи аввал аст. Мунтахаби Бразилия (1544 имтиёз) дар ҷойи дувум ва тими Олмон (1433 имтиёз) дар ҷойи севум мебошанд.

Аз байни кишварҳои пасошӯравӣ зинаҳои баландро дар раддабандии FIFA Украина (30-юм), Русия (56-ум) ва Узбакистон (61-ум) ба даст овардаанд. Мунтахаби Тоҷикистон дар байни кишварҳои Шӯравии собиқ танҳо аз Туркманистон (143) ва Молдова (164) пеш аст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube