Фурӯши иҷбории нон бо нархи давлатӣ

Ба гуфтаи рассонаҳо ҳафтаи гузашта дар растаи бозорҳои «Теке» ва «Алемгошар»-и Ишқобод эъломномаҳое пайдо шуданд, ки нархи нонро нишон медиҳанд.

«Дар онҳо нархи нон бо имзо ва муҳри раҳбарияти бозор нишон дода шудааст. Маъмурияти бозор ва масъулони шаҳрдорӣ ба фурӯшандаҳо ҳушдор доданд, ки агар нонро аз 1 манат гарон фурӯшанд, аз ҷой маҳрум ва 400 манат (114 доллар) ҷарима хоҳанд шуд», — иттилоъ дод хабарнигор 11 феврал.

Дар бозорҳои пойтахти Туркманистон нархи як нони одии 500-граммӣ 3 манат ва нони бо шир 5 манат аст. Ба гуфтаи фурӯшандаҳо, фурӯхтани нон бо нархи муайянкардаи мақомот — 1 манат барояшон зиёновар аст.

«Ҳоло пайдо кардани орди истеҳсоли Туркманистон хеле мушкил шудааст. Агар пайдо ҳам шавад, бо он танҳо нон пухта намешавад. Онро касе намехарад. Бинобар ин, маҷбурем, орди воридотӣ низ илова кунем. Як кило орди истеҳсоли Русия 12 манат аст. Ҳамчунин барои ҳар як метри раста рӯзона се манат медиҳем», — гуфт як нонпази туркман.

Хабарнигор мегӯяд, дар пайи талаботи ахири шаҳрдории Ишқобод бештари растаҳои нонфурӯшии бозорҳо холӣ шудаанд.