Гранти калонҳаҷми хонандаҳои тоҷик танҳо барои омӯзиш аст

Се нафар хонандаи тоҷик соҳиби 220 ҳазор доллар грант гардиданд, ки гуфта мешавад, танҳо барои омӯзиш аст, на барои ба касе туҳфа ё нақдӣ кардан.

Бино ба гуфтаи Сурайё Неъматова, директори Литсей барои хонандагони болаёқати шаҳри Хуҷанд, ин се хонанда — Алиҷон Усмонов, Абӯбакр Комилов ва Аслан Насратшоев дар олимпиадаи сатҳи ҷаҳонии MATH-CHALLANGE 2021 дар кишвари Тайланд аз фанни математика бо забони англисӣ иштирок намуда, ғолибият ба даст оварда, соҳиби Шоҳҷоизаи озмун — гранти омӯзишӣ дар Донишгоҳи Амрикои Шимолӣ гардидаанд.

“Гранти омӯзишии мазкур дар умум 220 ҳазор долларро ташкил дода, имкон медиҳад, ки 3 хонандаи номбурдаи литсей тӯли 4 сол ройгон дар Донишгоҳи бонуфузи Амрикои Шимолӣ (North American University) таҳсил намуда, ҳамчунин бо хобгоҳ ва хӯроки ройгон таъмин карда шаванд”- мегӯяд Сурайё Неъматова.

Маблағи солонаи таҳсил (бидуни хобгоҳ ва хӯрок) дар Донишгоҳи Амрикои Шимолӣ барои хориҷиён 12 700 доллари амрикоиро ташкил дода, гранти ба даст овардаи Литсей танҳо барои омӯзиши ин 3 хонанда сарф карда мешавад.

Ҳамчунин, тибқи сертификат ва номаи расмии Донишгоҳи Амрикоӣ Шимолӣ гранти мазкур то 3 сол эътибор дошта, дар муҳлати зикршуда хонандагони литсей баъди хатми муассиса бо пешниҳоди сертификат ва номаи расмии литсей омӯзишашонро дар шаҳри Стаффорди штати Техас дар Донишгоҳи Амрикои Шимолӣ идома медиҳанд.

Бояд гуфт, ки Донишгоҳи Амрикои Шимолӣ аз пурнуфузтарин донишгоҳҳои Амрико ба ҳисоб рафта, ба 10-гонаи беҳтарин донишгоҳҳои Иёлоти Муттаҳидаи Амрико шомил аст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube