Хонандаи тоҷик соҳиби беш аз як миллион доллар шуд (аудио)

Талабаи Литсей барои хонандагони болаёқат дар шаҳри Хуҷанд соҳиби Шоҳҷоиза — гранти омӯзишӣ ба маблағи беш аз 1 миллион доллари амрикоӣ ва интихоби идомаи таҳсил дар 8 донишгоҳи кишвари Амрико гардид.

Тибқи иттилои директори Литсей барои хонандагони болаёқат дар шаҳри Хуҷанд Сурайё Неъматова, хонандаи синфи 11-уми муассисаи мазкур Алишер Қосимов дар озмунҳои донишгоҳҳои Амрико дар соли 2022 иштирок намуда, соҳиби Шоҳҷоиза — гранти омӯзишӣ ба маблағи беш аз 1 миллион доллари амрикоӣ ва имтиёзи таҳсили ройгон дар 8 Донишгоҳи бонуфузи кишвари Амрико ва Швейтсарияро ба даст овард.

Алишер Қосимов — хонандаи Литсей барои хонандагони болаёқат дар шаҳри Хуҷанд яке аз аз омилҳои ба ин муваффақияти комил расидани худро дар омӯхтани фанҳои таълимӣ бо забони англисӣ дар Литсей донистааст. Ӯ мегӯяд, ки дар раванди иштирокаш дар озмунҳои мазкур ӯ давоми 2 моҳ «эссе»-ро бо забони англисӣ навишта пешниҳод намудаву ғолиб гардидааст.

Лозим ба ёдоварист, ки танҳо дар соли хониши 2021-2022 хонандагони Литсей барои хонандагони болаёқат дар шаҳри Хуҷанд дар беш аз 13 олимпиадаҳои фаннии сатҳи ҷаҳонӣ дар кишварҳои Амрико, Туркия, Тайланд, Малайзия, Сингапур, Бразилия, Русия, Ҳиндустон, Олмон, Британияи Кабир ва Фаронса иштирок намуда, соҳиби 356 медалҳои тилло, нуқра ва биринҷӣ гардидаанд.

Моро дар Телеграм пайгирӣ намоед: https://t.me/tojikistontimes

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube