Ихроҷи шаҳрвандони тақаллубкори Ӯзбекистон аз Финландия

Хадамоти муҳоҷирати Финландия баҳору тобистони соли ҷорӣ 139 шаҳрванди Ӯзбекистонро аз кишвар ихроҷ кардааст.

Ба навиштаи расонаҳои финландӣ, 219 шаҳрванди дигари Ӯзбекистон дар ояндаи наздик ихроҷ хоҳанд шуд.

Ба ҷуз ин, дархости 258 зодаи Ӯзбекистон барои дарёфти визаи корӣ рад шудааст. Дар шаш моҳи охир танҳо 42 тан аз ӯзбекистониҳо тавонистаанд, ҳаққи кор дар Финландияро пайдо кунанд.

Хадамоти муҳоҷирати Финландия мегӯяд, ӯзбекистониҳое, ки дар кишвар кор меҷӯянд, дипломҳои тақаллубӣ доранд. Аз он ҷо ки аксари ӯзбекистониҳо дар Финландия дар сохтмонҳо кор мекунанд, мадракҳои онҳо ҳам гӯё аз омӯзишгоҳҳои сохтмонӣ дода шудааст.

«Нахустин дипломҳои тақаллубӣ дар соли 2015 ошкор шуданд. Соли 2016 чанд адад, соли 2017 бештар ва дар соли 2018 ба садҳо адад расид», — иттилоъ дод Хадамоти муҳоҷирати Финландия.

Мақомоти Финландия мегӯянд, ҳуҷҷатҳо бесифат буданд ва «омӯзишгоҳи сохтмоние, ки онҳоро додааст», 26 сол пеш баста шудааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube