Ихтилофи навбатӣ дар марзи Тоҷикистон бо Қирғизистон

Рӯзи гузашта миёни сокинони манотиқи марзии Тоҷикистону Қирғизистон моҷарои навбатӣ рух додааст.

Дар ин бораи нашрияи 24.Kg-и Қирғизистон ба истинод ба манобеъи Хадамоти давлатии марзбонии ин кишвар хабар додааст.

Бино ба иттилои Хадамоти давлатии марзбонии Қирғизистон, шаҳрвандони Тоҷикистон дар атрофи фурӯшгоҳе дар минтақаи баҳснок дар наздики деҳаи Кӯк Тоши вилояти Боткенти ин кишвар ба сохтмони девор шурӯъ кардаанд.

Дар натиҷа ҳудуди 30-40 нафар шаҳрвандони қирғиз дар ин маҳал гирдиҳам омада хостори мутаваққиф шудани корҳои сохтмонӣ шудаанд.

Дар пайи ин моҷаро марзбонони қирғиз ба маҳали ҳодиса омада ва аз шаҳрвандони Тоҷикистон талаб кардаанд, ки сохтмони деворро қатъ кунанд. Аммо ҷавоби рад гирифтаанд.

Дар ҳамин ҳол, Иқбол Тешаев, як масъули ҳукумати шаҳри Исфара дар саҳифаи “Фейсбку”-и худ ҳодисаи мазкурро “амалҳои тахрибкоронаи қирғизҳо” унвон кардааст.

Ба навиштаи вай, маҳз сокинони маҳаллаи Кӯк-Тоши деҳаи Оқсойи ноҳияи Боткент аз омилони ин моҷаро буда, “шишаҳои тирезаҳои мағоза ва шиферҳои боми нонвойхонаи маҳаллаи Сомониёни ҷамоати Чоркӯҳро барқасдона шикатаанд”.

Ҳамчунин, ба иттилои Иқбол Тешаев, қирғизҳо шишаҳои мошини сабукрави  сокини маҳаллаи Сомониён Урмониддин Сафаровро шикастаанд.

Ба иддаои вай, “ин амалҳои моҷароангезона, ки таҳти ҳимояту пуштибонии сарҳадбонони қирғиз рух додаанд, боиси норозигӣ ва изтироби сокинони маҳаллаҳои наздисарҳадии деҳоти Чоркӯҳ гардидаааст”.

Ба хотири ҳалли ин моҷаро мулоқоти марзбонони Тоҷикистону Қирғизистон ва намояндагони ҳукуматҳои Боткенту Суғд баргузор шудааст.

Дар ин нишаст тасмим гирифта шудааст, ки корҳои сохтмонӣ дар ин минтақаи баҳснок мутаваққиф шавад.

Дар зарфи 5 рӯзи ахир ин дуюмин моҷаро миёни сокинони манотиқи марзии ин ду кишвар маҳсуб мешавад.

Рӯзи 11 декабр ба ҳангоми гузарондани корҳои кишоварзӣ дар минтақаи миёни Лангари Моҳиёни ҷамоати Чоркӯҳи Тоҷикистон ва Мин-Булоқи ноҳияи Боткенти Қирғизистон мухолифате рух дода, аммо марзбонони ин ду кишвар тавонистанд онро зуд ҳал кунанд.

Имтидоди марзи Тоҷикистону Қирғизистон 976 километрро ташкил дода ва то ҳол танҳо 504 километри он мушаххас ва аломатгузорӣ шудааст.

Вуҷуди манотиқи баҳснок дар марзи Тоҷикистону Қирғизистон боиси сар задани мухолифатҳо ва ҳатто задухӯрд миёни сокинони манотиқи марзӣ мешавад.

Дар моҳи сентябри соли ҷорӣ бар асари задухӯрди сокинони манотиқи марзии Тоҷикистону Қирғизистон, ки марзбонони ин ду кишвар низ ширкат доштанд, 3 марзбони тоҷик вҷа 1 сарҳадбони қирғиз кушта шуданд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube