Иштироки ду тоҷик дар маросими савгандёдкунии Трамп
Курсанти академияи ҳарбии Ню-Йорк
Дар маросими савгандёдкунии президенти 47-уми Амрико Доналд Трамп дар қатори курсантҳои Академияи ҳарбии Ню-Йорк (NYMA) ҷавони тоҷик Фирдавс Аҳмадзода ҳам ширкат намуд.
Қадамзании Фирдавс дар паради ҳарбӣ аз ҷониби шабакаи телевизиони CBN News сабт шудааст. Падари Фирдавс — рӯзноманигори тоҷик Умедҷон Аҳмадзода мегӯяд, ки писараш ба варзиши ҷудо машғул буда, феълан дар NYMA таҳсил мекунад. Хонаводаи онҳо соли 2021 соҳиби Green Card шуда, ба ИМА кӯчидаанд.
Мавриди зикр аст, ки Доналд Трамп низ аз 13-солагӣ то соли 1964 курсанти Академияи ҳарбии Ню-Йорк буд.
Дорандаи медали тиллои конгресс
Тоҷики дигаре, ки дар маросими савгандёдкунии Трамп ширкат кард, полиси тоҷиктабори амрикоӣ Далер Латифзода аст. Ӯ яке аз афсарони полис буд, ки дар таъмини амнияти ин маросими муҳим саҳм гузошт.
Далерро ҳам яке аз шабакаҳои телевизионии Амрико сабт кардааст. Далер фарзанди бастакори маъруфи тоҷик Алишер Латифзода аст. Ин хонавода чанд сол аст, ки муқими ИМА ҳастанд. Далер соли 2021 бо гурӯҳи худ дар ошӯбҳои Капитолий корнома нишон дода, медали тиллоии Конгрессро соҳиб шудааст. Далер дар баробари кор дар полис варзишгар буда, дар муҳорибаҳои якҳарба Устоди варзиш мебошад. Ӯ ҳамчунин дар варзиши шпагат дар рӯйи курсӣ дар ҷаҳон рекорд гузоштааст.
Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube
Шарҳ