Истиқболи гарми қаҳрамони ҷаҳон Нуралӣ Эмомалӣ дар Душанбе

Шоми 19-уми август дар Фурудгоҳи байналмилалии Душанбе Нуралӣ Эмомалӣ, қаҳрамони ҷаҳон оид ба ҷудо миёни ҷавонон бо иштироки васеи варзишгарону мухлисони варзиш гарму самимӣ истиқбол гирифта шуд.

Ёдовар мешавем, ки Нуралӣ Эмомалӣ дар чемпионати ҷаҳон оид ба ҷудо, ки 10-13-уми август дар шаҳри Гуаякили кишвари Эквадор баргузор гардид, дар рӯзи аввали ин мусобиқа медали тилло ва унвони қаҳрамони ҷаҳонро дар корномаи худ сабт кард. Ӯ дар рейтинги ҷаҳонии ҷудокорон мақоми дуввумро соҳиб гашт.

Қобили зикр аст, ки Нуралӣ дорандаи дуввумин медали тилло дар таърихи ҷудои тоҷик аз Қаҳрамониҳои ҷаҳон миёни ҷавонон мебошад. Бори аввал Сомон Маҳмадбеков соли 2019 дар кишвари Марокаш ин унвонро соҳиб гашта буд.

Нуралӣ Эмомалӣ мегӯяд, ки “заҳматҳои шашмоҳаи мо самара дод, то шаҳди қаҳрамонии ҷаҳонро бичашем. Мо танҳо ба хотири ғолибият сафар намуда будем”.

Метавонед муфассалтар ба даст овардании қаҳрамонии Нуралӣ Эмомалӣ, назари устодону хешу табор ва дӯстонашро дар шумораи нави ҳафтаномаи “Тоҷикистон” мутолиа намоед.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube