Изҳори ҳамдардии Рустами Эмомалӣ ба пайвандони филмбардори маъруф Заур Дахте

Раиси шаҳри Душанбе Рустами Эмомалӣ бинобар даргузашти Заур Дахте — филмбардор ва аксбардори маъруф ба пайвандону наздикони марҳум сабри ҷамил хост.

“Бинобар даргузашти филмбардор ва аккоси шинохта, ходими хидматнишондодаи фарҳанги Ҷумҳурии Тоҷикистон Заур Дахте изҳори ҳамдардӣ баён намуда, ба наздикону пайвандони марҳум сабри ҷамил хоҳонам”,- омадааст дар изҳори ҳамдардии раиси шаҳри Душанбе.

Ёдовар мешавем, ки Заур Дахте, филмбардор ва аксбардори маъруфи дар Тоҷикистон дар пайи як садамаи нақлиётӣ дар роҳи Варзоб ба ҳалокат расид.

Гуфта мешавад, ки ба худраве, ки ӯ идора мекард, мошини боркаш бархӯрда, номбурда дар ҷойи ҳодиса ба ҳалокат расидааст. Ҳодиса дар километри 34-ум шоҳроҳи Душанбе-Чаноқ дар Варзоб иттифоқ афтодааст.

Яке аз пайвандони Заур Дахте ба pressa.tj хабар дод, ки дар мошин ҳамсар ва фарзанди марҳум ҳам будаанд, ки ҷон ба саломат бурдаанд.

Заур Дахте соли 1936 дар Доғистон ба дунё омадааст. Ӯ факултаи наворбардории ВГИК-и Маскавро хатм намудааст.

Заур Дахте чун наворбардори филмҳои Абдураҳмони Ҷомӣ (1964), «Намоиш» (1976), «Мирзо Турсунзода-70» (1981), «Маликаи мо» (1983), «Вохӯриҳои моҳи сентябр» (1987), “Рустам ва Суҳроб” ва ғайраҳо машҳур аст.

Ҷанозаи Заур Дахте имрӯз, 16-уми август соати 12:00 дар кӯчаи Нусратулло Махсум 73/3 баргузор мешавад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube