Кӯкнор коридӣ, бурдӣ, накоридӣ, мурдӣ?!

Ин дафъа фармони «ҷинсият» ба он шаҳрвандони Афғонистон, ки дар муассисаи таҳсилоти олӣ таҳсил мекунанд ва ё қасди дохил шуданро доранд, дахл кардааст.

Мақомоти кунунии Афғонистон қонуни наверо ҷорӣ намуданд, ки шаҳрвандонро маҳдуд мекунад. Дар ин бора рӯзномаи маҳаллии Ariana News бо такя ба изҳороти Вазорати маорифи кишвар хабар медиҳад.

Ба гуфтаи ин манбаъ, Толибон тасмим гирифтаанд, ки таҳсилоти донишгоҳиро аз рӯи ҷинс тақсим кунанд. Мувофики план дар рӯзҳои гуногун машғулиятҳо барои студентон ва студентдухтарон гузаронида мешаванд. Ба ҳар як гуруҳ се рӯз дар як ҳафта дода мешавад: занон рӯзҳои душанбе, чоршанбе ва шанбе ва мардон рӯзҳои сешанбе, панҷшанбе ва якшанбе.

Қаблан Толибон фармон содир карда буданд, ки тибқи он шабакаи машҳури иҷтимоии TikTok ва тирпарронии онлайни PUBG: BATTLEGROUNDS дар Афғонистон мамнуъ шуданд. Радикалҳо шабакаи иҷтимоии дар боло зикршуда ва бозиро сабаби таъсиррасонӣ ба зеҳни насли наврас унвон кардаанд, ки ба таҳсил халал мерасонад.

Илова бар ин, ҳукумати худхондаи Афғонистон бо манъи дигар дар ҳайрат мононд: деҳқонон дар саросари кишвар дигар иҷозати парвариши кӯкнорро надоранд. Чунин фармонро Ҳайбатулло Охундзода, раҳбари олии Толибон содир кардааст.

Қобили зикр аст, ки беш аз 80% тамоми афюни ҷаҳон дар Афғонистон парвариш карда мешавад. Тибқи ҳисобҳои СММ, дар соли 2021 хазинаи Кобул аз ҳисоби фурӯши маводи мухаддир тақрибан 2,3 миллиард доллар пур шудааст. Барои деҳқонони афғон кӯкнор ба яке аз зироатҳои сердаромад табдил ёфтааст, ки бидуни он аҳолӣ ба қашшоқии боз ҳам бештар дучор хоҳад шуд.

Ёдовар мешавем, ки чанде пеш мақомоти феълии Кобул пахши маводҳои расонаҳои хориҷиро ба шабакаҳои маҳаллӣ манъ карда буданд. Намояндаи расмии Вазорати дифои Толибон Лутфулло Ҳабибӣ қайд кард, ки расонаҳои хориҷӣ ба мардуми кишвар таъсири манфӣ расониданд.

Ҳамчунин, дар авохири моҳи март Толибон қонуне содир карданд, ки дар як вақт ҳузури занон ва мардонро дар боғ манъ мекунад. Тибқи ин фармон, ба занон дар рӯзҳои якшанбе, душанбе ва сешанбе ва дар ҳама рӯзҳои дигар ба мардон иҷоза дода мешавад, ки аз боғҳо дидан кунанд.

Хабарҳои моро дар Телеграм пайгирӣ намоед: https://t.me/tojikistontimes

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube