Кашфи 10 кони нави тилло дар Тоҷикистон

Илҳомҷон Оймуҳаммадзода — сардори Саридораи геологияи назди Ҳукумати Тоҷикистон мегӯяд, ки дар қаламрави ҷумҳурӣ 10 кони нави тилло ёфт шудааст.

Ба гуфтаи ӯ, конҳои нав дар қисмати марказии Тоҷикистон ва ВМКБ ҷойгир буда, захираҳои онҳо пас аз таҳқиқоти дахлдор дақиқан муайн карда мешаванд.

“Ғайр аз ин, дар ноҳияҳои Муъминобод ва Шамсиддин Шоҳин дар масофаи умумии 52,5 километр 13 қитъаи тиллои рехта ошкор шуда, ба Вазорати молия ҷиҳати додани иҷоза ба аҳолӣ барои гирифтани он пешниҳод шуд”,- изҳор дошт Оймуҳаммадзода.

Ҳоло дар Тоҷикистон 137 кон бо захираҳои ҳисобшудаи тиллои саноатӣ ва 127 кон бо захираҳои тиллои ғайрисаноатӣ мавҷуданд. Беш аз 10 корхона ба истеҳсоли металлҳои қимматбаҳо, аз ҷумла истихроҷи тилло машғуланд, ки бузургтарини онҳо дар баробари КМ «Зарафшон», КМ «Апрелевка», корхонаи давлатии «Тиллои тоҷик», корхонаи заршӯйӣ (артел)-и «Одина», инчунин ширкати «Пакрут» мебошанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube