Кушта шудани қочоқчии афғон дар марзи Тоҷикистон

Тавре Муҳаммад Улуғхоҷаев, сухангӯи раёсати марзбонии Тоҷикистонгуфтааст, марзбонҳо ҳангоми хидмат дар минтақаи тобеи дидбонгоҳи сарҳадии “Панҷ” гуруҳи 5 нафарии марзшиканҳоро  ки ба интиқоли маводи мухаддир аз тарафи Афғонистон ба Тоҷикистон машғул будаанд мушоҳида кардаанд: “Қочоқчиёни мусаллаҳ ба амри сарҳадбонони тоҷик итоат накардаанд, ки дар натиҷа задухӯрди мусаллаҳона ба вуқӯъ омад”.

Дар натиҷаи ин даргирӣ яке аз қочоқчиён кушта шуда, шарикони дигараш ақибнишинӣ кардаанд: “Ҳангоми азназаргузаронии ҷои ҳодиса тақрибан 39 кило маводи мухаддир, як яроқи оташфишони АК 7,62, 146 дона тири қутраш 7,62 бо 5 тирдон ва 1 телефони мобилӣ дарёфт карда шуд”.

Айни ҳол Раёсати Кумитаи давлатии амнияти миллӣ дар Хатлон аз рӯи ин ҳодиса парвандаи ҷиноятӣ оғоз намуда, тафтишот идома дорад.