“Лолаи тиллоӣ” ва бӯҳрони синамои тоҷик

Шоми 1 декабр Кинофестивали милии «Лолаи тиллоӣ» бо ғолибияти режиссёрҳои ҷавон Таҳмина Ҳакимова, Далери Эмомалӣ ва коргардони таҷрибадор Зайналобиддини Мӯсо ба поён расид. Ҷамъбасти “Лолаи тиллоӣ” дар ҳолест, ки коршиносон вазъи синамои тоҷикро ваҳим арзёбӣ мекунанд.

“Лолаи тиллоӣ” чист?

“Лолаи тиллоӣ” лоиҳаи озмоишии маркази фарҳанги “Бактрия” дар соҳаи кинематография дар Тоҷикистон мебошад, ки аз ҷониби сафорати Фаронса дар Тоҷикистон ва киностудияи давлатии “Тоҷикфилм” дастгирӣ ёфт.

Ҷашнвора 25-уми ноябр оғоз шуд ва муддати 6 рӯз  филмҳои тоҷикие, ки солҳои охир дар заминаи киностудияи “Тоҷикфилм” наворбардорӣ шудааст дар он ба намоиш гузошта шуд. 

Ҷашнвораи миллии “Лолаи тиллоӣ” имсол нахустин бор дар шаҳри Душанбе баргузор шуда, ҳадафи он ҳавасманд гардонидани беҳтарин намунаҳои синамои тоҷик ва тарғиби онҳо дар дохилу хориҷи кишвар арзёбӣ мешавад.

Дар ҷашнвораи нахустин беш аз 20 филми коргардонҳои ҷавони тоҷик пешкаш шуда буд. Ҳайати ҳакамони “Лолаи тиллоӣ”-ро киношинос ва коргардони ҷавони тоҷик Шарофат Арабова роҳбарӣ мекард.

Ҷоизаҳои нахустин Кинофестивали миллии “Лолаи тиллоӣ”-ро се коргардони ҷавон — Таҳмина Ҳакимова барои филми кутоҳи «Пудина» (Беҳтарин дебют), Далери Эмомалӣ барои филми «Умарако» (Беҳтарин филми мустанад) ва Зайнулобиддини Мусо барои филми «Дуғоб» (Беҳтарин филми кӯтоҳ) ба даст оварданд. Филми охир аз рӯйи ҳикояи “Кӯзаи дӯғ”-и Нависандаи халқии Тоҷикистон Сорбон ба навор гирифта шудааст.

Ҳамчунин, дар “Лоли тиллоӣ” Ҷоизаи махсуси ҳакмонро «Аз баландии парвоз» ном филми коргардон Акмал Восидӣ сазовор шуд.  Ҷоизаи махсуси дигар ба номи коргардони номвари синамо шодравон Комил Ёрматов барои саҳми бозасо дар рушди синамои тоҷик ба пайвандонаш тақдим гардид.

Бӯҳрони кинои тоҷик

Ҷамъбасти кинофестивали “Лолаи тиллоӣ” дар ҳолест, ки коршиносон вазъи синамои кишварро нигаронкунанда арзёбӣ мекунанд. 

Шарофат Арабова, киношинос ва сарҳаками “Лолаи тиллоӣ” мегӯяд, ки кинемотографистони тоҷик феълан нигарони ояндаи синамову филмсозӣ ҳастанд:  “Мушкилот аз таҳияи намоишномаи филм шурӯъ шуда, то пахши он дар кинотеатрҳо идома меёбад. Мушкили аслӣ дар он аст, ки мутахассисони ҳирфаӣ дар ин соҳа дар Тоҷикистон намондааст. Ҳоло ҳама дар фикри он ҳастанд, ки ояндаи ин санъат чӣ мешавад? Танҳо умедворӣ мондааст ва шояд барои ҳамин дар бештари филмҳо кӯдак ва сарнавишти хуби вай ба умед тасвир мешавад” – мегӯяд Шарофат, ки худ чандин филм таҳия кардааст.

Ин нуктаро Шарофат дар мизи мудавваре, ки дар доиари Ҷашновораи миллии “Лолаи тиллоӣ” баргузор шуд, ироа кард.

Ағлаби коршиносон мушкилоти нахустини кинои тоҷикро дар набудани маблағ арзёбӣ мекунанд. 

Ҳол он ки Элмира Хасанова, мутахассис аз Ӯзбекистон гуфт, ки танҳо дар соли 2019 дар беш аз 100 студияи кишвараш 22 филми бадеӣ, 24 мустанад ва 12 филми тасвирӣ офаридаанд. Ба гуфтаи вай, буҷаи филми бадеӣ аз 200 то 500 ҳазор доллар ва филми тасвирии 10-дақиқагӣ то 50 ҳазор доллар аст.

Дар Тоҷикистон чунин буҷаро барои филмҳо фақат орзу кардан мумкин аст. Ба ҳар ҳол баргузор шудани чандин ҷашнвораи кино дар кишвар барои рушди кинои тоҷик ва муаррифии он мусоидат мекунад, мегӯянд мутахасисони кино.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube