Мактаби №52 маркази “Сириус” мешавад?

Моҳи июни соли ҷорӣ маълум шуд, ки бинои яке аз мактабҳои пойтахт ба ихтиёри Донишгоҳи Русияву Тоҷикистон (Славянӣ) дода шуда, ҳамчун аналоги маркази таълимии русии «Сириус» ба истифода дода мешавад.

То соли 2018 мактаби таҳсилоти умумии Донишгоҳи Русияву Тоҷикистон (Славянӣ) дар хиёбони Рӯдакӣ ҷойгир буд, аммо дар робита ба татбиқи нақшаи генералӣ тасмим гирифта шуд, ки бинои куҳна тахриб шавад.

Ба ин муносибат коллектив ва хонандагони мактаб муваққатан ба бинои мактаби шаҳрии рақами 52 дар кӯчаи Шевченко гузаронида шуданд. Ҳамин тариқ, ду муассисаи таълимӣ дар як бино: мактаби РТСУ ва мактаби рақами 52, ки дар идоракунӣ, истифодабарии таҷҳизот ва ташкили раванди таълим дучори мушкилот гардиданд, дар як бино фаъолият мекарданд.

Ҳуҷҷати интиқоли мактаби рақами 52 ба РТСУ дар ҷараёни сафари моҳи июни муовини нахуствазири Русия Марат Хуснуллин  дар  Душанбе ба имзо расид. Ин санадро муовини вазири илм ва таҳсилоти олии Федератсияи Русия Константин Могилевский ва вазири маориф ва илми Тоҷикистон Раҳим Саидзода имзо кардаанд.

Дар мактаби Донишгоҳи Русияву Тоҷикистон (Славянӣ) ба ҷуз аз барномаи асосии таълимии русӣ, забони тоҷикӣ ва ҳамчунин фанҳои таъриху ҷуғрофияи Тоҷикистон низ таълим дода мешавад.

Аз замони ба имзо расидани созишномаи байниҳукуматӣ дар соли 2007 мактаб тибқи қоидаҳои муқарраршуда бидуни тағйирот фаъолият мекунад. Тибқи ин санад, кӯдакон аз синни ҳафтсолагӣ дар онҷо ройгон тибқи стандартҳои таълимии Русия таҳсил мекунанд.

Пас аз синфи 9 хонандагон имтиҳони асосии давлатӣ ва баъд аз синфи 11 имтиҳони ягонаи давлатӣ месупоранд ва шаҳодатномаҳои русӣ мегиранд.

Коршиносони сохтмони Русия аллакай аз бинои мактаби рақами 52 дидан кардаанд ва ҳоло нақшаи бозсозии ин маҷмаа таҳия мешавад. Ҷониби Русия тасмим гирифтааст, ки биноро ҳарчи зудтар тармим ва мутобиқи талаботи муосир барои муассисаҳои таълимии Русия муҷаҳҳаз созад. Ҳозир баъзе корҳои таъҷилӣ ба ҷо оварда мешаванд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube