Муҳаббат ба Парчами миллӣ 24 нафарро муҷозот кард

11 ронанда ва 13 хонандаи мактабҳои миёнаи шаҳри Душанберо барои вайрон кардани қоидаҳои ҳаракат ва тартиботи ҷамъиятӣ ҳангоми таҷлили Рӯзи Парчами миллӣ боздошт карданд.

Дар ин бора раёсати корҳои дохилии шаҳри Душанбе рӯзи 26 ноябри соли 2023  хабар дод.

Ба гуфтаи ин мақомот санаи 24-уми ноябр, дар кӯчаҳои А.Сино ва Маяковский ҳангоми таҷлили Рӯзи Парчами миллӣ як гурӯҳ ронандагон ҳаракати гурӯҳӣ ташкил намуда, мусофирони онҳо, ки ҳама ноболиғанд, парчамҳо дар даст худро аз тирезаҳои мошинҳо берун бароварда, тартиботи ҷамъиятӣ ва қоидаҳои ҳаракат дар роҳро  вайрон карда ва ҷони худро зери хатар гузоштаанд.

Вобаста ба ин, нисбати 11 ронанда барои ташкили ҳаракати гурӯҳӣ протоколҳои маъмурӣ тартиб дода, нисбати 5 нафар хонандагон аз ноҳияи Рӯдакӣ маводи зарурӣ барои чораҷӯӣ ба ШВКД-1 дар ноҳияи Рудакӣ ирсол карда шуд.

Инчунин нисбати волидайни 8 хонандаи мактабҳои миёнаи Душанбе тибқи талаботи моддаи 90 КҲМ ҶТ протоколи маъмурӣ тартиб дода шуда, барои чораҷӯӣ ба додгоҳ ирсол карда шуд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube