Муштзанҳои тоҷик дар «Шаби чемпионҳои IBA»

26-уми август дар шаҳри Серпухови наздики Маскави Русия дар қасри варзиши «Надежда» шоми бокси «Шаби чемпионҳои IBA» баргузор мешавад, ки дар он намояндаҳои Тоҷикистон низ ширкат мекунанд.

Ин мусобиқа ба пешвози Рӯзи ҷаҳонии бокс, ки чун анъана 27-уми август қайд карда мешавад, баргузор хоҳад шуд. Дар ин шом 9 набард бо ширкати варзишгарони маъруф ба нақша гирифта шудааст. Қаҳрамонҳои ҷаҳон, ғолибони Бозиҳои олимпиву мусобиқоти ҷаҳонӣ, чеҳраҳои маъруфи олами бокс аз гӯшаву канори дунё ба ринг мебароянд.

Дар ин мусобиқа муштзани маъруфи Тоҷикистон Баҳодур Усмонов дар вазни 63,5 кг ба ринг мебарояд ва бо муштзани Венесуэла Луис Арокон майдондорӣ мекунад. Ҳамчунин, аз Тоҷикистон Шоҳрух Ҷиёнов ба муқобили Егор Назаров аз Русия ба ринг мебарояд.

Набарди асосӣ дар ин шом дар вазни 92 кг байни Муслим Ҳоҷимуҳаммадов (Русия), ки ду маротиба чемпиони ҷаҳон шудааст ва Хулио Ла Крус аз Куба, ки панҷ маротиба унвони чемпиони ҷаҳон ва ду маротиба унвони чемпиони Бозиҳои олимпиро соҳиб шудааст, баргузор мегардад. Ин муштзанҳо пештар низ бо ҳам рақобат кардаанд ва ҳисоб 0:2 бар нафъи Ла Крус аст.

Дар ин шом ҳамчунин чемпиони ҷаҳон Марк Петровский бо муштзани таҷрибадор аз Эквадор Хулио Кастилйо ба ринг мебарояд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube