Набераи Зиёдулло Шаҳидӣ сазовори идрори Гуггенхайм гардид

Фарангис Нуруллохоҷа- оҳангсози тоҷики муқими Канада, набераи бастакори маъруфи тоҷик Зиёдулло Шаҳидӣ сазовори идрори Гуггенхайм гардид. Дар ин бора дар сомонаи шахсии Фарангис Нуруллохоҷа (http://farangis-nurulla.com/)  иттилоъ дода шудааст.

Тавре аз Маркази матбуоти Вазорати фарҳанги Ҷумҳурии Тоҷикистон хабар додаанд, гранти Фонди таърихии Джон Саймон Гуггенхайм ба шаҳрвандони ИМА, Канада ва Америкаи Лотинӣ, ки дар соҳаи санъат ба дастовардҳои назаррас ноил гардида, бо фаъолияти худ сазовори истеъдоди фавқулода буданашонро собит кардаанд, супорида мешавад.

Фарангис Нуруллохоҷа дар сомонаи худ зикр кардааст: «Эҷоди мусиқӣ – ин саёҳат ба олами то ҳол кашфнашуда, ҷустуҷӯи оҳанг дар фазое мебошад, ки касе надидааст ва нашунидааст».

Номбурда дар шаҳри Душанбе ба дунё омада, маълумоти олиро дар Консерваторияи Шветсия гирифтааст ва дар ИМА ва Франсия такмили ихтисос  намудааст.

Ёдовар мешавем, ки Фарангис соли 2017 Ҷоизаи тиллоии «Мусиқии ҷаҳонӣ» («Global music»)-ро низ ба даст оварда буд.

Боиси ифтихор аст, ки Фарангис Нуруллохоҷа бо осораш дили ҳаводорони санъати классикиро дар аксари кишварҳои дунё ба даст оварда, санъати нотакрори тоҷикро ба ҷаҳониён муаррифӣ  менамояд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube