Нахустин мусобиқаи «Ҷоми Роҳи Абрешим» баргузор мешавад

Соли 2025-ум бори нахуст бо ташаббуси Ассотсиатсияи футболи кишварҳои Осиёи Марказӣ (CAFA) миёни бошгоҳҳои ин минтақа «Ҷоми Роҳи Абрешим» баргузор мешавад.

Тибқи тартиби баргузорӣ мусобиқа аз марҳилаҳои интихобӣ, гурӯҳӣ ва ниҳоӣ иборат аст. Дар маҷмуъ, дар ин мусобиқа 10 даста иштирок мекунанд. 6 дастаи ғолиби чемпионатҳои Эрон, Ӯзбекистон, Туркманистон, Тоҷикистон, Қирғизистон ва Афғонистон соҳиби роҳхати мустақим ба марҳилаи гурӯҳӣ мешаванд.

Барандагони Ҷоми кишварҳои Туркманистон, Тоҷикистон, Қирғизистон ва Афғонистон дар марҳилаи интихобӣ барои 2 роҳхати дигар ба марҳилаи гурӯҳӣ талош мекунанд. Ҳар даста дар гурӯҳ 3 бозӣ баргузор мекунад. Ғолибони гурӯҳҳо ва дастаҳои ҷойи дуюм ба марҳилаи ниҳоӣ роҳхат мегиранд. Дар бозӣ барои ҷойи сеюм дастаи дуюми гурӯҳи «В» бо дастаи дуюми гурӯҳи «А» рақобат мекунад. Дар финал ғолиби гурӯҳи «А» бо пешсафи гурӯҳи «В» барои қаҳрамонӣ мубориза мебарад.

Бозиҳои марҳилаи интихобӣ охири моҳи март ва марҳилаи ниҳоӣ аз 26-уми апрел то 6-уми май баргузор мешаванд. Макони баргузории бозиҳои марҳилаи ниҳоӣ дертар эълон мегардад. Бо эҳтимоли зиёд аз Эрон ва Ӯзбекистон ба ҷойи қаҳрамонҳои чемпионати ин кишварҳо дастаҳои дигар иштирок мекунанд. Тоҷикистонро дастаҳои “Истиқлол” ва “Регар-ТадАЗ” намояндагӣ мекунанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube