Намоиши «Муҳаббати сиёҳ» дар Ӯзбекистон манъ шуд

Телевизиони Ӯзбекистон — Zo’R TV намоиши филми бисёрсериягии туркии «Қара севда» (Муҳаббати сиёҳ)-ро ҳамагӣ се рӯз пеш оғоз шуда буд, дубора қатъ кард.

«Муҳаббати сиёҳ» феврали соли 2018, пас аз намоиши чандин серия бо дастури сарвазири Ӯзбекистон аз эфир гирифта шуд. Як мансабдори ӯзбек, ки нахост номаш бурда шавад, гуфт, намоиши филмро ин бор низ сарвазир Абдулло Орипов шахсан манъ кардааст.

Намояндаи телевизиони Zo’R TV бо таассуф гуфт, ки филми «Муҳаббати сиёҳ» бо дархости тамошобинони мазҳабӣ аз эфир бардошта шуд.

«Сангро ҳамеша ба дарахти мевадор ҳаво медиҳанд. Сангро ба дарахти себ партофтанд. Ин «ҳомиёни ахлоқ» ба воситаи шабакаҳои иҷтимоӣ, аз ҷумла Телеграм имзо ҷамъ карда, ба қабулгоҳи президент муроҷиат карданд ва дар ниҳоят намоиши филм манъ шуд. Ин филм бисёр машҳур ва дӯстдоштаи мардум буд», — афзуд ӯ.

Ба гуфтаи мансабдори ӯзбек, сарвазири Ӯзбекистон 30 июл дар ҷаласаи видеоие ба қатъи намоиши филм дастур додааст. Мансабдори дигаре, ки дар ҷаласа иштирок дошт, гуфт, Орипов дар ин замина ба шаҳрдори Тошканд Ҷаҳонгир Ортиқхоҷаев муроҷиат кард.

Сарвазири Ӯзбекистон 14 феврали соли 2018 низ «Муҳаббати сиёҳ»-ро танқид карда буд ва 16 феврал филм аз эфир гирифта шуд.

Филми «Муҳаббати сиёҳ» солҳои 2015-2017 аз сӯи коргардонҳои турк наворбардорӣ ва дар 28 кишвари дунё намоиш дода шудааст. Соли 2017 он беҳтарин филм дониста шуда, ҷоиза низ ба даст овардааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube