Нишасти матбуотӣ пеш аз оғози марҳилаи интихобии Ҷоми Осиё-2024 (U-23)

Дар остонаи оғози марҳилаи интихобии Ҷоми Осиё-2024 миёни дастаҳои олимпии то 23-сола дар гурӯҳи «I» дар меҳмонхонаи «Румӣ»-и шаҳри Душанбе ҷаласа баргузор шуд.

Бино ба иттилои ТВ “Варзиш”, дар ҷамъомад масъулини мусобиқот — комиссари КФО Алим Орифов аз Ӯзбекистон, нозири доварон Владислав Сейтлин (Ӯзбекистон), намояндагони кумитаи тадорукоти маҳаллӣ, менеҷерони дастаҳои олимпии Тоҷикистон, Австралия ва Лаос ширкат доштаанд.

Дар ҷаласа ранги либоси дастаҳои иштирокчӣ низ тасдиқ карда шудааст.

Бояд гуфт, ки дар марҳилаи интихобии Ҷоми Осиё-2024 дар гурӯҳи «I» мунтахаби олимпии Тоҷикистон (U-23) бо тимҳои миллии Лаос (9-уми сентябр) ва Австралия (12-уми сентябр) бозӣ мекунад. Вохӯриҳо дар Варзишгоҳи марказии Душанбе баргузор мешаванд.

Бар асоси натоиҷи марҳилаи интихобӣ ғолибони 11 гурӯҳ ва ҳамчунин 4 дастаи беҳтарини зинаи дуюм ба қисми ниҳоии Ҷоми Осиё-2024 (U-23), ки аз 15-уми апрел то 3-юми майи соли оянда дар Қатар баргузор мешавад, роҳ меёбанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube