Номашро иваз карду ба зиндон афтод

Марди тоҷике, ки баъди иваз кардани номаш борҳо ғайриқонунӣ ба Русия омадаасту баъдан дар қапи пулис хурдаву бо ҷурмӣ қонуншиканӣ ҳабс шудааст.

Шаҳрванди Тоҷикистон дар вуруди чандбораи ғайриқонунӣ ба Русия гунаҳкор дониста шуд, хабар додааст «56orb.ru».

Додгоҳи ноҳияи Первомайи Оренбург шаҳрванди Тоҷикистонро бар он гунаҳкор хонд, ки панҷ бор ғайриқонунӣ ба қаламрави Русия ворид шудааст.

Манбаъ афзуд, муҳоҷирро ба муддати 8 моҳи зиндон маҳкум кардаанд.

Дар зимн шаҳрванди Тоҷикистон аз болои қарор ба додгоҳи вилояти шикояти кассатсионӣ бурдааст, аммо дархосташ қонеъ карда нашудааст.

Зимни мурофиа муайян шудааст, ки ҳанӯз соли 2015 дар вилояти Владимир қарори ихроҷи ин зодаи Тоҷикистон барои ҳуқуқвайронкунии маъмурӣ содир шудааст. Аммо ӯ аз иҷрои қарор саркашӣ кардаасту дар қаламрави Русия мондааст. Баъди як сол, соли 2016 ӯро маҷбурӣ аз қаламрави кишвар хориҷ карда, вурудашро барои панҷ сол мамнуъ намудаанд.

Баъди бозгашт ба Ватан ин мард номашро тағйир дода, бо шиносномаи нав боз панҷ бори дигар, тайи солҳои 2018-2020 марзи Русияро убур кардааст. Ин дафъа, охири моҳи январ ӯро боздошт ва зиндонӣ кардаанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube