Ғофилободиҳо аз марги Фотимаю Зӯҳро ғофил монданд

 22 ноябр, соати  1 рӯз,  бар асари сӯхтори як хона дар деҳаи Ғофилободи ҷамоати Дӯкони шаҳри Норак ду тифли дугоники яксола Фотима ва Зӯҳро дар коми оташ ба ҳалокат расидаанд.

Багуфтаи шоҳидон, модарашон Фотимаву Зӯҳроро дар гаҳвора баста, худ ба ошхона барои пухтани нон меравад.

Дар вақти дар ошхона будани зан либосҳои таре, ки барои хушкондан рӯи бухорӣ (печка)-и барқ гузошта буд, баъди хушкидан дармегиранд ва забонаи оташ якбора ин манзилро бо ҳарду кӯдаки банди гаҳвора ва шаш дар хона фаро гирифтааст.Падари тифлакон дар муҳоҷират қарор доштаасту модарашон субҳи он рӯз ба тӯйи яке аз хешовандон омодагӣ дида, хамир мешӯрад ва дар тараддуди нонпазӣ шуда, тифлаконро дар гаҳвора мебандад. Ӯ ҳамин тавр либосҳои нимтарро ба рӯи бухорӣ (печка)-и барқӣ тунук карда, аз қазо фаромӯш мекунад, ки баъди хушкидан либосҳоро аз болои бухорӣ бигирад. Келин ҳамроҳи хушдоманаш бо кулчапазӣ машғул шуда, бехабар мемонанд, ки бухорӣ дар дохили хона оташ гирифта, дар як муддати кӯтоҳ тамоми шаш дар хонаашонро сӯзонда, ба хокистар табдил медиҳад.Ҳамсояҳо бохабар шуда, ба маҳалли сӯхтор омаданд, вале доманаи оташ он қадар баланд буд, ки зӯри мардум ба хомӯш карданаш нарасид ва сӯхторнишонҳоро даъват карданд.Сӯхторнишонҳо вақте расиданд, ки ин манзил алакай сӯхта хокистар шуда буд. Аз зери овори хона ду гаҳвораро  бо ҷасадҳои сӯхтаи ду тифли маъсум берун кашиданд.

Дугоникҳо ҳамагӣ як сола буданд…

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube